जळगाव, (प्रतिनिधी) : शहरातील काशिनाथ चौक परिसरातून चोरलेली दुचाकी शोधण्यात एमआयडीसी पोलीस स्टेशनच्या गुन्हे शोध पथकाला यश आले आहे. याप्रकरणी दोन आरोपींना अटक करण्यात आली असून, त्यांच्याकडून चोरीची ‘सुपर स्प्लेंडर’ मोटारसायकल हस्तगत करण्यात आली आहे.
धानोरा खु. (ता. जळगाव) येथील रहिवासी शालिक पाटील हे आपल्या कामासाठी जळगाव शहरात आले होते. त्यांनी आपली हिरो होंडा सुपर स्प्लेंडर (क्र. एम एच १९ ए के ०२०७) काशिनाथ चौक परिसरात पार्क केली होती. सामान खरेदी करून परतल्यानंतर त्यांना आपली दुचाकी चोरी झाल्याचे लक्षात आले. याप्रकरणी एमआयडीसी पोलीस ठाण्यात गुन्हा दाखल करण्यात आला होता.
एमआयडीसी पोलीस स्टेशनचे पोलीस निरीक्षक बबन आव्हाड यांच्या मार्गदर्शनाखाली पथकाने तपासाची चक्रे फिरवली. गुप्त बातमीदार आणि यावल पोलीस स्टेशनचे पोनि रंगनाथ धारबळे व त्यांच्या पथकाच्या मदतीने संशयित आरोपी आतिष जितेंद्र पोथीवाल (रा. कांचन नगर, जळगाव) याला १ फेब्रुवारी रोजी ताब्यात घेण्यात आले. पोलिसी खाक्या दाखवताच त्याने आपला साथीदार गणेश लक्ष्मण कोळी (रा. साकेगाव, ता. भुसावळ) याच्या मदतीने ही चोरी केल्याची कबुली दिली. पोलिसांनी दोघांना अटक करून त्यांच्याकडून चोरीचे वाहन जप्त केले आहे. न्यायालयाने आरोपींना दोन दिवसांची पोलीस कोठडी सुनावली आहे.
सदर कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे यांच्या मार्गदर्शनाखाली पोनि बबन आव्हाड, पोउनि राहुल तायडे, चंद्रकांत धनके, प्रमोद लाडवंजारी, गिरीश पाटील, प्रदीप चौधरी, गणेश ठाकरे, राहुल घेटे आणि योगेश घुगे यांनी केली आहे. या गुन्ह्याचा अधिक तपास पोलीस नाईक प्रदीप चौधरी आणि पोलीस कॉन्स्टेबल योगेश घुगे हे करत आहेत.
