जळगाव, (प्रतिनिधी) : जळगाव महानगरपालिकेच्या राजकारणात महायुतीने ऐतिहासिक कामगिरी करत निर्विवाद वर्चस्व प्रस्थापित केले आहे. ७५ पैकी ७० जागांवर विजय मिळवत महायुतीने विरोधकांचा सुपडा साफ केला असून, यात भारतीय जनता पक्षाने सर्व ४६ जागा जिंकून १००% यशाचा विक्रम नोंदवला आहे. या विजयानंतर आज महापौरपदी भाजपच्या दीपमाला काळे आणि उपमहापौरपदी शिवसेना (शिंदे गट) चे मनोज चौधरी यांची बिनविरोध निवड निश्चित झाली आहे.
बौद्धिक आणि राजकीय गणितांची जुळवाजुळव..
जी. एम. फाउंडेशनच्या कार्यालयात झालेल्या महत्त्वपूर्ण बैठकीत राज्याचे मंत्री गिरीश महाजन यांनी या नावांची अधिकृत घोषणा केली. “राज्यात पहिल्यांदाच इतक्या खेळीमेळीच्या वातावरणात हा निर्णय झाला आहे,” असे महाजन यांनी यावेळी नमूद केले. भाजपला सर्वाधिक जागा मिळाल्याने महापौरपद भाजपकडे, तर उपमहापौरपद मित्रपक्ष असलेल्या शिवसेनेला देण्याचा शब्द महायुतीने पाळला आहे.
विकासाचा नवा ‘रोडमॅप’..
निवडीनंतर बोलताना मंत्री गिरीश महाजन म्हणाले की, “जनतेने आपल्यावर दाखवलेला विश्वास सार्थ ठरवण्याची जबाबदारी आता सर्व नगरसेवकांची आहे. शहराचे प्रलंबित प्रश्न आणि विकासकामे प्राधान्याने मार्गी लावली जातील. पात्र असलेल्या प्रत्येकाला भविष्यात संधी मिळेल, त्यामुळे कोणीही नाराज होऊ नये.” पालकमंत्री गुलाबराव पाटील यांनीही नवनिर्वाचित पदाधिकाऱ्यांचे अभिनंदन केले. “नगरसेवकांनी आपापसातील मतभेद विसरून जळगावच्या विकासाचा गाडा वेगाने पुढे न्यावा,” असे आवाहन त्यांनी केले.
अकराव्या मजल्यावर उमेदवारी अर्ज दाखल..
पक्षाच्या बैठकीनंतर सर्व नगरसेवक आणि दिग्गज नेत्यांच्या उपस्थितीत महानगरपालिका गाठण्यात आली. नगरसचिव शुक्ला यांच्याकडे महापौरपदासाठी दीपमाला मनोज काळे आणि उपमहापौरपदासाठी मनोज सुरेश चौधरी यांनी आपले अर्ज दाखल केले. यावेळी आमदार राजूमामा भोळे, आमदार मंगेश चव्हाण, आमदार चंद्रकांत सोनवणे, आमदार सुरेश भोळे यांच्यासह महायुतीचे पदाधिकारी व कार्यकर्ते मोठ्या संख्येने उपस्थित होते.
