जळगाव, (प्रतिनिधी) : ब्लू स्टार क्लब झेटीएस भुसावळ तर्फे आयोजित ‘सेव्हन ए साईड’ फुटबॉल नाईट टुर्नामेंटमध्ये जैन इरिगेशनच्या फुटबॉल संघाने आपल्या कौशल्याच्या जोरावर विजेतेपद पटकावले आहे. २१ ते २६ जानेवारी दरम्यान झेडआरटीआय फुटबॉल मैदानावर रंगलेल्या या स्पर्धेत जैन इरिगेशनने अंतिम सामन्यात जालन्याच्या संघाचा ३-१ अशा फरकाने पराभव करून चषकावर आपले नाव कोरले.
स्पर्धेचा थरार आणि जैन इरिगेशनची घोडदौड..
या स्पर्धेत महाराष्ट्र आणि मध्य प्रदेशातील एकूण २४ नामांकित संघांनी सहभाग नोंदवला होता. जैन इरिगेशनच्या संघाने सुरुवातीपासूनच मैदानात वर्चस्व राखले:
पहिला सामना: ५-० अशा मोठ्या फरकाने विजय.
दुसरा सामना: ३-१ ने विजय.
तिसरा आणि चौथा सामना: प्रत्येकी ३-० ने विजय मिळवून
अंतिम सामना: जालना संघाविरुद्ध अत्यंत चुरशीच्या झालेल्या या सामन्यात ३-१ ने बाजी मारत जैन इरिगेशनने विजेतेपद मिळवले.
अमनसिंग रावत ठरला ‘गोल्डन बूट’चा मानकरी..
संपूर्ण स्पर्धेत जैन इरिगेशनचा अमनसिंग रावत आकर्षणाचे केंद्र ठरला. त्याने बचावात्मक खेळासोबतच ५ महत्त्वाचे गोल केले आणि ४ गोल करण्यासाठी साहाय्य (Assist) केले. त्याच्या या अष्टपैलू कामगिरीबद्दल त्याला ‘सर्वोत्कृष्ट खेळाडू’ म्हणून ‘गोल्डन बूट’ देऊन गौरविण्यात आले. या स्पर्धेतील एक विशेष क्षण म्हणजे जैन इरिगेशनचा गोलरक्षक फहाद खान याने आपल्या गोल पोस्टमधून थेट समोरच्या गोल पोस्टमध्ये गोल केला. त्याचे हे कसब प्रेक्षकांसाठी विशेष आकर्षण ठरले.
विजेत्या संघात अमनसिंग रावत (५ गोल), फवाज अहमद (२), सुरज सपके (२), लक्ष्य हरपनानी (१), मिराज खान (१), मयूर मोरे (१) आणि अमित कोळी (१) यांनी गोल नोंदवले. त्यांना अरबाज खान, निखील माळी, यश फार्सवॉन आणि फहाद खान यांनी उत्तम साथ दिली. संघाला मुख्य प्रशिक्षक अब्दुल मोहसिन यांचे मार्गदर्शन लाभले.
मान्यवरांच्या हस्ते गौरव..
स्पर्धेचे उद्घाटन वस्त्रोद्योग मंत्री आ. संजय सावकारे यांच्या हस्ते झाले होते. पारितोषिक वितरण समारंभाला माजी मंत्री आमदार एकनाथराव खडसे, श्रीकांत चौधरी आणि अमन चौधरी उपस्थित होते. या यशाबद्दल जैन इरिगेशनचे अध्यक्ष अशोक जैन, अतुल जैन, अभंज जैन, अरविंद देशपांडे आणि रवींद्र धर्माधिकारी यांनी खेळाडूंचे कौतुक केले आहे.
