जळगाव, (प्रतिनिधी) : येथील हर्षल प्रदीप भावसार (वय ३१, रा. दिनकर नगर) या तरुणाच्या मृत्यूचे गूढ उकलले आहे. हॉटेलमध्ये जेवण करताना झालेल्या वादातून तिघांनी त्याला मारहाण करून रेल्वे रुळावर फेकून दिल्याचे धक्कादायक वास्तव समोर आले आहे. या प्रकरणी तिघांविरुद्ध गुन्हा दाखल करण्यात आला असून, एका संशयित आरोपीला अटक करण्यात आली आहे.
हॉटेलमध्ये ‘चोर पऱ्या’ बोलण्यावरून वाद..
सोमवारी जळगाव ते भादली मार्गावर रेल्वे रुळाजवळ हर्षल भावसार याचा मृतदेह आढळून आला होता. कुटुंबीयांनी घातपाताचा संशय व्यक्त केल्यानंतर पोलिसांनी तपास सुरू केला. स्थानिक गुन्हे शाखेच्या पथकाने सीसीटीव्ही तपासले असता, हा मृत्यू अपघात नसून घातपात असल्याचे उघड झाले.
पोलिसांच्या तपासात समोर आलेल्या माहितीनुसार, हॉटेलमध्ये बसल्यानंतर हर्षलने परेश संजय महाजन याला ‘चोर पऱ्या’ बोलल्याच्या कारणावरून त्यांचा वाद झाला. त्यानंतर परेशचा भाऊ भूषण संजय महाजन (वय ३१, रा. ज्ञानदेव नगर) आणि लोकेश मुकुंदा महाजन यांनी हर्षलला हॉटेलमध्ये मारहाण केली. मारहाणीनंतर हर्षल तिथून निघून गेला.
दुचाकीवरून नेऊन रेल्वे रुळावर फेकले..
मारहाण करणाऱ्या आरोपींनी, परेश महाजनसह, हर्षलचा पाठलाग करत त्याला का.ऊ. कोल्हे शाळेजवळ पकडले. तिथून त्याला दुचाकीवर बसवून असोदा शिवारातील एका शेतात नेण्यात आले. तिथे पुन्हा मारहाण करून त्याला रेल्वे रुळावर फेकून देण्यात आले. याच वेळी रेल्वेची धडक लागून हर्षलचा मृत्यू झाल्याची फिर्याद मयताच्या आईने शनिपेठ पोलिस ठाण्यात दिली आहे.
एका संशयिताला अटक..
पोलिसांनी मयताच्या आईच्या फिर्यादीवरून तिघांविरुद्ध गुन्हा दाखल केला आहे. स्थानिक गुन्हे शाखेच्या पथकाने तातडीने तपास करत भूषण महाजन याला ताब्यात घेतले. चौकशीदरम्यान, त्याने हर्षलला मारहाण केल्यानंतर रेल्वे रुळावर फेकल्याची कबुली दिली. त्यानुसार त्याला अटक करण्यात आली आहे. इतर दोन आरोपी- परेश संजय महाजन व लोकेश मुकुंदा महाजन यांचा शोध पोलीस घेत आहेत. या प्रकरणाचा पुढील तपास सहायक निरीक्षक साजीद मन्सुरी करत आहेत.
