भुसावळ, (प्रतिनिधी) : शहरातील एका शाळेत शिकणाऱ्या १६ वर्षांच्या अल्पवयीन मुलीचे अपहरण करून तिच्यावर अत्याचार झाल्याची धक्कादायक घटना उघडकीस आली आहे. या प्रकरणी पोलिसांनी पाल, ता. रावेर येथील २२ वर्षीय संशयित आरोपी तौसिफ जहाबाद तडवी याला अटक केली आहे. न्यायालयाने त्याला १८ ऑगस्टपर्यंत पोलिस कोठडी सुनावली आहे.
पीडित मुलगी भुसावळ शहरातीलच एका शाळेत शिक्षण घेते. ७ ऑगस्ट रोजी आरोपी तडवी याने शाळेत जाऊन मुख्याध्यापकांना मुलीचा भाऊ असल्याचे खोटे सांगून लेखी अर्ज दिला. मुख्याध्यापकांची दिशाभूल करून तो मुलीला सोबत घेऊन गेला. त्याने मुलीला मुंबई, चोपडा आणि जळगाव येथे नेले. ९ ऑगस्ट रोजी जळगाव शहरातील एका हॉटेलमध्ये त्याने मुलीवर अत्याचार केल्याचे तक्रारीत म्हटले आहे.
दरम्यान मुलीच्या वडिलांनी तातडीने पोलिसांत तक्रार दाखल केली. या तक्रारीनुसार १२ ऑगस्ट रोजी रात्री आरोपीविरुद्ध बाजारपेठ पोलिसांत गुन्हा दाखल करण्यात आला. गुन्हा दाखल झाल्यानंतर काही तासांतच पोलिसांनी आरोपीला अटक केली.
