जळगाव, (प्रतिनिधी) : शहरात अजिंठा चौफुली येथील चौधरी बॅटरी ट्रेडिंग नावाच्या दुकानातून ४१ हजार रुपये किमतीच्या ४१ जुन्या बॅटऱ्या चोरी झाल्या होत्या. याप्रकरणात एमआयडीसी पोलिसांनी चोरीचा २४ तासांत छडा लावत दोन संशयित आरोपींना अटक केली असून, त्यांच्याकडून ६ लाख रुपयांपेक्षा जास्त किमतीचा मुद्देमाल जप्त करण्यात आला आहे.
अब्दुल्ला किताबुल्ला चौधरी यांच्या चौधरी बॅटरी ट्रेडिंग दुकानाचे दि. १७ मे २०२५ रोजी मध्यरात्री लोखंडी शटर वाकवून अज्ञात चोरट्याने ४१ जुन्या बॅटऱ्या चोरल्या होत्या. या प्रकरणी १९ मे २०२५ रोजी एमआयडीसी पोलीस ठाण्यात गुन्हा दाखल करण्यात आला होता. जळगावचे पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी संदीप गावीत यांच्या मार्गदर्शनाखाली डीबी पथकाने घटनास्थळावरील सीसीटीव्ही फुटेजची कसून तपासणी केली. संशयित आरोपींनी पांढऱ्या रंगाच्या बोलेरो पिकअप वाहनाचा वापर केल्याचे निष्पन्न झाले. तांत्रिक माहिती आणि गोपनीय माहितीच्या आधारे तपास करत पोलिसांनी तेल्हारा, जि. अकोला येथून दोन संशयित आरोपींना जेरबंद केले.
पोलिसांनी दि. २० मे रोजी दुपारी १:४१ वाजता अजमदउल्ला अमानतउल्ला खान (वय २४, रा. पिंपळगाव राजा, ता. खामगाव, जि. बुलढाणा) आणि सैय्यद दानिश सैय्यद इस्माईल (वय २५, रा. घोडेगाव, ता. तेल्हारा, जि. अकोला) या दोन आरोपींना अटक करण्यात आली. त्यांच्याकडून चोरीस गेलेल्या ३१ हजार रुपये किमतीच्या वेगवेगळ्या कंपन्यांच्या बॅटऱ्या आणि गुन्ह्यात वापरलेली ६ लाख रुपये किमतीची महिंद्रा बोलेरो पिकअप (एमएच ३० व्हीडी ६८७३) जप्त करण्यात आली आहे. अशा प्रकारे एकूण ६,३१,०००/- रुपयांचा मुद्देमाल हस्तगत करण्यात आला आहे. कारवाईत एमआयडीसी पोलीस स्टेशनचे डीबी पथकाचे पो. उ. नि. राहुल तायडे, चंद्रकांत धनके, स. पो. उ. नि. दत्तात्रय बडगुजर, पो. ना. प्रदीप चौधरी, पो. को. सिद्धेश्वर डापकर, रतन गिते, योगेश बारी यांचा सहभाग होता. पुढील तपास सहायक फौजदार दत्तात्रय बडगुजर करत आहेत.
