जळगाव, (प्रतिनिधी) : अमळनेर येथून मुलीच्या परीक्षेचा पेपर देऊन जळगाव शहरात परत येत असताना धरणगाव तालुक्यातील पिंप्रिं येथे भरधाव बोलेरोने स्विफ्ट कारला दिलेल्या भीषण धडकेत कारमधील पित्याचा मृत्यू झाला आहे. तर मुलीसह आणखी एक जण गंभीर जखमी झाले आहेत. शासकीय रुग्णालयात नातेवाईकांनी एकच आक्रोश केला होता.
महेश सुरेश सोनार (वय ४५, जळगाव) असे मयत व्यक्तीचे नाव आहे. ते रामेश्वर कॉलनी मध्ये पत्नी, दोन मुली यांच्यासह राहत होते. पाणी जारचा व्यवसाय करून ते परिवाराचा उदरनिर्वाह करीत होते. दरम्यान, महेश सोनार यांची मोठी मुलगी नयना सोनार हिचा एमबीए सिईटीचा पेपर असल्यामुळे त्यांना अमळनेर येथे जायचे होते. सकाळी कारने अमळनेर येथे सिईटीचा पेपर देण्यासाठी मुलगी नयना सोनार आणि राजेश मिठूलाल धूत (वय ४६, रा. दौलत नगर, जळगाव) यांच्यासह अमळनेर येथे गेले होते. परीक्षा आटोपून परतताना दुपारी दीड वाजता धरणगाव तालुक्यातील पिंप्रिं गावाजवळ त्यांच्या स्विफ्ट कारला भरधाव बोलेरो वाहनाने जबर धडक दिली.
या धडकेत गंभीर जखमी तिघांना जळगाव येथील शासकीय वैद्यकीय महाविद्यालय व रुग्णालयात दाखल करण्यात आले.रुग्णालयात महेश सुरेश सोनार यांना वैद्यकीय अधिकाऱ्यांनी तपासून मयत घोषित केले. तर जखमी राजेश मिठूलाल धूत आणि नयना महेश सोनार यांच्यावर रुग्णालयामध्ये उपचार सुरू आहेत. रुग्णालयामध्ये महेश सोनार यांच्या नातेवाईक व मित्रपरिवार यांनी प्रचंड आक्रोश केला. घटनेची माहिती मिळताच धरणगाव पोलीस स्टेशनचे कर्मचारी घटनास्थळी दाखल झाले होते. तर मयत महेश सोनार यांच्या मृत्यूमुळे जळगाव शहरातील रामेश्वर कॉलनी येथे शोककळा पसरली आहे.
