जळगाव, (प्रतिनिधी) : श्री विठ्ठलाच्या दर्शनासाठी यावल तालुक्यातील दोघे मित्र दर्शनासाठी गेले असताना चंद्रभागा नदीत स्नान करण्यासाठी उतरले. त्यात एका तरुणाचा बुडून मृत्यू झाल्याची घटना रविवारी सकाळी समोर आली आहे. बुडालेल्या तरुणाचा सुमारे आठ तासानंतर मृतदेह मिळून आला आहे. पंढरपूर शहर पोलीस स्टेशनला अकस्मात मृत्यूची नोंद घेण्याचे काम सुरू होते. त्यामुळे यावल तालुक्यावर शोककळा पसरली आहे.
यावल तालुक्यातील न्हावी गावचा रहिवासी दर्शन नारायण कोलते (वय १८) असं बुडालेल्या तरूणाचे नाव आहे. दरम्यान दर्शन कोलते व त्याचा मित्र मनोज रघुनाथ कापडे (वय १८,रा. न्हावी ता. यावल) हे पंढरपूरला विठ्ठलाचे दर्शन घेण्यासाठी गेले होते. पंढरपूरमध्ये पोहचल्यानंतर दर्शन आणि त्याचा मित्र सकाळी चंद्रभागा नदी पात्रात स्नानासाठी गेले होते. येथील भक्त पुंडलिक मंदिरजवळ ते नदीत उतरले होते. दरम्यान पाण्याचा अंदाज न आल्याने दर्शन व त्याचा मित्र दोघे बुडाले. दोघेजण बुडत असल्याचे नदीत असलेल्या भाविकांच्या लक्षात आले.
यानंतर त्यांनी लागलीच मदत करत मनोज कापडे याला बाहेर काढत वाचवले. मात्र दर्शन कोलते याचा पाण्यात बुडून मृत्यू झाला. त्याचा मृतदेह आठ तासांनी हाती लागला. याबाबतची माहिती स्थानिक प्रशासनाला देण्यात आली असून पोलीस प्रशासन व बचाव पथक येथे दाखल झाले त्यांच्याकडून बुडलेल्या तरूणाचा शोध सुरू करण्यात आला. सलग सुट्ट्या असल्यामुळे पंढरीत भाविकांनी विठ्ठल दर्शनासाठी मोठी गर्दी केली होती.
