रावेर, (प्रतिनिधी) : तालुक्यात अजनाड येथे ३२ वर्षीय युवा शेतकऱ्याने कर्जाला कंटाळून शेतातील लिंबाच्या झाडाला गळफास घेत आत्महत्या केल्याची घटना दि. १९ रोजी रात्री ८ वाजेच्या सुमारास उघडकीस आली. याप्रकरणी रावेर पोलीस स्टेशनला अकस्मात मृत्यूची नोंद करण्यात आली आहे.
अजनाड गावात राहत असलेला युवा शेतकरी योगेश भागवत चौधरी वय ३२ वर्ष या युवकाने दि. १९ मार्च रोजी संध्याकाळी ८ वाजेच्या दरम्यान घरच्या शेतात निंबाच्या झाडाला फाशी घेऊन जीवनयात्रा संपवली. दरम्यान रात्री त्यांचे मोठे भाऊ यशवंत चौधरी यांनी शोधाशोध केली असता त्यांना शेतामध्ये योगेश चौधरी यांचा मृतदेह दिसून आला.
त्यानंतर त्यांनी अजनाड पोलीस पाटील महेंद्र पाटील, उपसरपंच विजय पाटील यांना सांगितले. मृतदेह ग्रामीण रुग्णालयात नेण्यात आला. यावेळी कुटुंबीयांनी एकच आक्रोश केला. कर्जाला कंटाळून त्याने आत्महत्या केली अशी माहिती नातेवाईकांकडून मिळाली. अजनाड गावावर शोककळा पसरली आहे. रावेर पोलीस स्टेशनचे पोलीस निरीक्षक डॉ.विशाल जैसवाल यांच्या मार्गदर्शनाखाली पुढील तपास सुरू आहे.
