जळगाव, (प्रतिनिधी) : जळगाव शहरात भरधाव आयशरने एका पायी जाणाऱ्या तरुणाला उडवल्याची धक्कादायक घटना गुरुवारी दि. १९ डिसेंबर रोजी सकाळच्या सुमारास घडली आहे. एमआयडीसी पोलीस स्टेशनला घटनेची नोंद करण्याचे काम सुरू होते.
अजय सिताराम कोळी (वय २६ रा. पिंपळे खुर्द ता. धरणगाव) असे मयत तरुणाचे नाव आहे. त्याच्या पश्चात आई आणि लहान भाऊ असा परिवार आहे. गुरुवारी दिनांक १९ डिसेंबर रोजी सकाळी ११ वाजेच्या सुमारास भुसावळकडून जळगावकडे जाणाऱ्या एका भरधाव आयशरने पायी जाणाऱ्या अजय कोळी याला जोरदार धडक दिल्याने जागीच ठार झाल्याची घटना घडली आहे.
या घटनेची माहिती मिळाल्यानंतर एमआयडीसी पोलीस ठाण्याचे पोलीस कर्मचारी यांनी घटनास्थळी धाव घेऊन मृतदेहाचा पंचनामा करून शासकीय वैद्यकीय महाविद्यालयात रवाना करण्यात आला. दरम्यान मयताच्या खिशातील कागदपत्रामुळे त्यांची ओळख पटली आहे. नातेवाईकांनी रुग्णालयात येताच मन हेलावणारा आक्रोश केला. अजय कोळी याचे वडिलांचे नुकतेच दिनांक २ डिसेंबर रोजी मृत्यू झाल्यामुळे घरात शोकाचे वातावरण असतानाच आता पित्यापाठोपाठ मुलाचा मृत्यू झाल्यामुळे पिंपळे गावात शोककळा पसरली आहे. याबाबत एमआयडीसी पोलीस ठाण्यात गुन्हा दाखल करण्याचे काम सुरू होते.
