मुक्ताईनगर, (प्रतिनिधी) : शेतीसाठी कर्ज काढले असताना शेतीतून उत्पन्न मिळत नाही. यामुळे कर्जफेडीच्या विवंचनेत असलेल्या तरुण शेतकऱ्याने शेतात जाऊन विषारी द्रव्य प्राशन करून जीवनयात्रा संपविली. हि घटना बुधवारी मुक्ताईनगर तालुक्यातील रिगाव येथे घडली आहे. याबाबत मुक्ताईनगर पोलिस ठाण्यात आकस्मिक मृत्यूची नोंद झाली आहे.
सुरेश ओंकार विटे (वय ४०, रा. रिगाव ता. मुक्ताईनगर) असे मृत शेतकऱ्याचे नाव आहे. त्यांच्या पश्चात पत्नी व दोन मुले असा परिवार आहे. सदरची घटना दि. २ ऑक्टोबर रोजी सकाळी उघडकीस आली.(केपी) सुरेश विटे यांची शेती असून यावरच त्यांचा उदरनिर्वाह चालत होता. शेतीसाठी पीक कर्ज काढले असताना सततची नापिकी झाल्यामुळे कर्ज फेडू शकत नाही. यामुळेच डोक्यावर असलेल्या कर्जामुळे त्यांनी टोकाचे पाऊल उचलल्याचे नातेवाईकांनी सांगितले.
सुरेश विटे हे नेहमीप्रमाणे बुधवारी सकाळी साडेआठला रिगाव शिवारातील शेतात गेले होते. यावेळी त्यांनी विषारी द्रव्य प्राशन केले. दरम्यान ११ वाजेच्या सुमारास त्यांचा मुलगा गौरव त्यांचा जेवणाचा डबा घेऊन शेतात गेला.(केपी) यावेळी गौरवला वडील शेतातील झोपडीजवळ बेशुद्धावस्थेत दिसले. त्याने वडिलांना बघून हंबरडा फोडला आणि धावत जाऊन घरी सांगितले. यानंतर त्यांचे मोठे बंधू गणेश विटे यांनी तत्काळ शेताकडे धाव घेऊन भावाला मुक्ताईनगर उपजिल्हा रुग्णालयात आणले. तेथे डॉक्टरांनी तपासणी करून सुरेश विटे यांना मृत घोषित केले. याबाबत मुक्ताईनगर पोलिस ठाण्यात आकस्मिक मृत्यूची नोंद झाली आहे.
