जळगाव (प्रतिनिधी) : पायी जात असलेल्या फळविक्रेत्या महिलेच्या गळ्यातील ३० हजार रूपये किंमतीची सोन्याची पोत दुचाकीवर आलेल्या दोन जणांनी हिसकावून धूमस्टाईलने पलायन केल्याची घटना शहरातील मानराज पार्कजवळील रिक्षा स्टॉपजवळ बुधवारी घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
लिलाबाई रघुनाथ गोपाळ (वय ४७ रा. खंडेराव नगर, जळगाव) ह्या फळविक्री करून त्या उदरनिर्वाह करतात. बुधवारी दुपारी ४ वाजेच्या सुमारास त्या कामानिमित्ताने शहरातील मानराज पार्क येथील रिक्षा स्टॉपजवळ आलेल्या होत्या. तेथून पायी जात असतांना अनोळखी दोन जण दुचाकीवर आले. त्यांनी महिलेच्या गळ्यातील ३० हजार रूपये किंमतीची सोन्याची पोती जबरी हिसकावून चोरून नेल्याची घटना घडली आहे.
महिलेने जिल्हापेठ पोलीस ठाण्यात धाव घेवून तक्रार दिली. त्यानुसार दुचाकीवरील अनोळखी दोन जणांविरोधात गुन्हा दाखल करण्यात आला आहे. पुढील तपास पोहेकॉ नरेश सोनवणे हे करीत आहे.
