जळगावातील मानराज पार्क येथील घटना
जळगाव (प्रतिनिधि ) ;- एका भरधाव ट्रकने दिलेल्या धडकेत दुचाकीवरील दोन महिला जागीच ठार झाल्याची धक्कादायक घटना शहरातील मानराज पार्क ते गुजराल पेट्रोलपंपादरम्यान आज बुधवारी २८ ऑगस्ट रोजी दुपारी २ वाजेच्या सुमारास घडली आहे. या घटनेत एक वर्षांचा मुलगा जखमी झाला त्याला उपचारार्थ रुग्णालयात दाखल करण्यात आले आहे.
पायल उर्फ खुशी देवेंद्र जलंकर (वय १७) आणि दिक्षिता राहूल पाटील (वय २७ दोन्ही रा. द्वारकाई अपार्टमेंट, वाटिकाश्रम, जळगाव) असे मयत दोघांची नावे आहेत. द्वारकाई अपार्टमेंट येथे पायल जलंकर ही आई, वडील, लहान भाऊ यांच्यासह राहत होती. याच अपार्टमेंटमध्ये दिक्षिता पाटील या विवाहिता माहेरी आलेल्या होत्या. दिक्षिता पाटील ह्या नाशिक येथील रहिवाशी असून त्यांच्या वडीलांच्या नातेवाईकांचे निधन झाले होते. त्यामुळे गेल्या १० दिवसांपासून त्या माहेरी वाटिकाश्रम येथे आलेल्या होत्या.खोटेनगरकडून मानराज पार्ककडे येणाऱ्या उड्डाणपुलाच्या खाली दोन्ही महिला ह्या एक वर्षाच्या मुलाला सोबत घेवून दुचाकी क्रमांक (एमएच १८ एएस ५३७९ )ने जात असतांना दुचाकीच्या मागे भरधाव वेगाने येणाऱ्या ट्रकने त्यांच्या दुचाकीला जोरदार धडक दिली. या भीषण अपघातात दुचाकीवरील दोन्ही महिला जागीच ठार झाल्या तर सोबत असलेला चिमुकला गंभीर जखमी झाला आहे.
मिळालेल्या माहितीनुसार दोन्ही महिलांचे नातेवाईक हे एका हॉस्पिटलमध्ये दाखल असल्याने त्यांना पाहण्यासाठी जात असतांना ही घटना घडली आहे. अपघात घडल्यानंतर पोलीस कर्मचारी प्रवीण पाटील, हेमंत निकम, दिपक राव आदींनी सहकार्य केले. दरम्यान मृतांची ओळख पटविण्याचे काम सुरु होते.
