डॉ. उल्हास पाटील रुग्णालयाजवळील घटना
जळगाव (प्रतिनिधी ) : धावत्या रिक्षा समोर अचानक कुत्रा आडवा आल्याने रिक्षा उलटून तरुण जागीच ठार झाला तर चार ते पाच प्रवासी गंभीर जखमी झाल्याची घटना रविवार दि. १८ ऑगस्ट रोजी सायंकाळी सात वाजेच्या सुमारास राष्ट्रीय महामार्गावरील डॉ. उल्हास पाटील वैद्यकीय महाविद्यालय व रुग्णालयाजवळील हॉटेलसमोर घडली. यशवंत डोके (वय ३५, रा. भुसावळ) असे मृत तरुणाचे नाव असून इतर जखमींवर रुग्णालयात उपचार सुरु आहेत.
जळगावकडून भुसावळकडे जाणारी रिक्षा महामार्गावरील डॉ. उल्हास पाटील वैद्यकीय महाविद्यालय व रुग्णालयासमोरुन जात होती. यावेळी अचानक रिक्षा समोर कुत्र आडव आल्याने रिक्षा चालकाचे रिक्षावरील नियंत्रण सुटल्यामुळे रिक्षा उलटली. या अपघातात रिक्षातील प्रवासी यशवंत डोके हा तरुण जागीच ठार झाला, तर उषाबाई वारके रा. भुसावळ, चालक महेश सातव, मंगलसिंग राजपूत, शबानाबाई पिंजारी व नरेंद्र मराठे हे गंभीर जखमी झाले.
यातील शबानाबाई पिंजारी व नरेंद्र मराठे हे गंभीर जखमी झाले असून त्यांच्यावर अतिदक्षता विभागात उपचार सुरु आहेत. नशिराबाद पोलीस ठाण्याचे कर्मचाऱ्यांनी तात्काळ घटनास्थळी धाव घेत. जखमींना तात्काळ डॉ. उल्हास पाटील वैद्यकीय रुग्णालयात दाखल केले. याठिकाणी त्यांच्यावर उपचार सुरु आहेत. याप्रकरणी नशिराबाद पोलिसात रात्री उशिरापर्यंत घटनेची नोंद करण्याचे काम सुरु होते.
