मुक्ताईनगर, दि.११ – संवेदना फाउंडेशनतर्फे राष्ट्रवादी काँग्रेसच्या महिला प्रदेशाध्यक्ष ॲड. रोहिणी खडसे यांनी मतदारसंघातील इयत्ता दहावी बारावीतील गुणवंतांच्या सत्कारासह सेवाभावी संस्था आणि निराधार पाल्यांचा केलेला सत्कार हा सर्वांसाठी निश्चितच प्रेरणादायी राहील. अशा कार्यक्रमांच्या माध्यमातून विद्यार्थ्यांच्या मना-मनामध्ये स्पर्धा निर्माण होऊन त्यांना अधिक प्रगती साधणे सहज शक्य होते. विद्यार्थ्यांनी मोठी स्वप्न पाहून अधिक जिद्दीने, चिकाटीने परिश्रम करून अपेक्षित यश साध्य करावे आणि आई-वडिलांचे नाव रोशन करावे. असे प्रतिपादन विधान परिषद सदस्य आ. एकनाथ खडसे यांनी मुक्ताईनगर येथे केले.
संवेदना फाउंडेशन तर्फे येथील गोदावरी मंगल कार्यालयाच्या प्रांगणात आयोजित गुणवंत विद्यार्थी गौरव सोहळ्याप्रसंगी आ. खडसे बोलत होते. यावेळी ईश्वर रहाणे, यु. डी. पाटील, निवृत्ती पाटील, विनोद तराळ, सोपान पाटील, सुधीर तराळ, रमेश खाचणे, नितीन कांडेलकर, राजु माळी, निलेश पाटील, प्रमोद धामोडे, प्रवीण कांडेलकर, भागवत पाटील, महबूब भाई, मुन्ना बोंडे आदींसह विविध शाळांचे मुख्याध्यापक व्यासपीठावर उपस्थित होते.
दरम्यान कार्यक्रमात ॲड. रोहिणी खडसे यांनी प्रास्ताविकातून यशस्वी मुलामुलींच्या कौतुकासोबतच त्यांच्या पालकांचेही विशेष अभिनंदन केले. संवेदना फाउंडेशनच्या माध्यमातून यापुढेही गौरवाची ही परंपरा कायम चालू राहणार असल्याचा शब्द दिला. दरम्यान मतदार संघातील ज्या मुला मुलींचे छत्र हरवले आहे, अशा निराधार मुला-मुलींसह मातांना तसेच सेवाभावी सामाजिक संस्थांचा सन्मानचिन्ह व प्रशस्तीपत्र देऊन गौरव करण्यात आला. या कार्यक्रमात सुमारे ३०० शालेय गुणवंत विद्यार्थी, २२ निराधार पाल्य आणि आठ सेवाभावी संस्थांना गौरविण्यात आले. कार्यक्रमाचे सूत्रसंचालन प्रा. एस. बी. साळवे, रंजना महाजन योगिता पाटील यांनी केले.
