जळगाव, दि.०५ – मैत्रीदिनानिमीत्त विद्यार्थ्यांच्या हस्ते वृक्षारोपण करून झाडांशी मैत्री व्हावी म्हणून मेहरूण परिसरातील श्री संत ज्ञानेश्वर प्राथमिक व माध्यमिक विद्यालयात विद्यार्थ्यांच्या हस्ते वृक्षारोपण करण्यात आले. यावेळी झाडांचे महत्व शिक्षकांनी सांगितले. तसेच शाळेच्या परिसरातुन वाजतगाजत वृक्षदिंडी काढण्यात आली.
मैत्री दिनानिमित्त झाडाशी मैत्री व्हावी म्हणून विद्यार्थ्यांकडून वृक्ष संवर्धनाचा संकल्प करण्यात आला. पुढल्या फ्रेंडशिप डे येईपर्यंत वर्षभराच्या काळात पर्यावरणाचा विचार करता शाळेच्या परिसरात वृक्षारोपण करण्यात आले. वृक्षारोपण व त्यांचे संवर्धन सुद्धा करणार आहोत, असे विद्यार्थ्यांनी सांगितले. औषधी झाडे, फुले फळांची झाडे, वड, साग, पिंपळ, कडुनिंब, गुलमोहर यासारखे वृक्षांची रोपे लावण्यात आली.
यावेळी परिसरात विद्यार्थ्यांनी वृक्षदिंडी काढली. वाद्यांच्या गजरात विद्यार्थ्यांनी शाळेच्या परिसरात वृक्षांचे महत्व सांगत परिसर पर्यावरणमय केले. यानंतर मुख्याध्यापक मुकेश नाईक यांनी विद्यार्थ्यांना झाडाचे महत्व सांगितले. कार्यक्रमासाठी शाळेतील शिक्षक, शिक्षकेतर कर्मचाऱ्यांनी परिश्रम घेतले.
