लालसिंग पाटील | भडगाव, दि. १२ – तालुक्यातील कजगाव येथे एका सराफाच्या दुकानावर बंदुकीचा धाक दाखवून दरोड्याचा प्रयत्न झाल्याची घटना शनिवारी संध्याकाळी साडे चार ते पाच वाजेच्या सुमारास घडली. स्टेशन रोड वरील बालाजी ज्वेलर्स वर दोन ते तीन अज्ञात बंदुकधारी लोक सोने खरेदीच्या बहाण्याने सराफाच्या दुकानात घुसुन बंदूक दाखवून लुटण्याचा प्रयत्न केला. मात्र व्यापाऱ्याने आरडाओरड केल्याने दरोड्याचा प्रयत्न फसला. या घटनेमुळे कजगाव परिसरात एकच खळबळ उडाली.
भर गर्दीच्या ठिकाणी घडलेल्या या खळबळजनक घटनेमुळे गावात एकच चर्चेला उधाण आले. गजबजलेल्या सराफ बाजारातील व्यापारी उमेश बोरा हे दुकानात असतांना दोन बंदुकधारी दरोडेखोर दुकानात शिरले व त्यांनी आपल्या जवळील बंदूक व्यापाऱ्याच्या दिशेने रोखली. व्यापाऱ्याने वेळीच प्रसंगवधान राखून आरडाओरड केल्याने बंदुकधारी हल्लेखोरांनी पळ काढला. सुदैवाने याघटनेत कोणालाही दुखापत झाली नाही. मात्र भर दिवसा सराफ दुकानावर झालेला दरोड्याच्या प्रयत्नामुळे व्यापाऱ्यांमध्ये दहशतीचे वातावरण आहे.
घटनास्थळी अप्पर पोलीस अधीक्षक रमेश चोपडे, स्थानिक गुन्हेशाखेचे पोलीस निरीक्षक किसन नजन पाटील, भडगावचे पोलीस निरीक्षक राजेंद्र पाटील, गुन्हेशाखेचे पोलीस उपनिरीक्षक गणेश चौबे यांनी पोलीस ताफ्यासह भेट देऊन पाहणी केली.
दरोडेखोरांनी गुन्ह्यात वापरलेली गाडी सापडली..
भर दिवसा बंदूकीचा धाक दाखवून लुटण्याचा प्रयत्न करणारे भामटे निसटण्यात यशस्वी झाले. मात्र कजगाव पासून काही अंतरावर असणाऱ्या गावाजवळ पोलिसांना गुन्ह्यात वापरलेली स्विफ्ट गाडी मिळाली. मात्र त्यातील आरोपी पसार होण्यात यशस्वी झाले. तर गुन्ह्यात वापरलेली गाडी देखील चोरीची असल्याची शक्यता वर्तवली जात आहे.