गजानन पाटील | अमळनेर, दि.२१ – गेल्या कित्येक दिवसांपासून अमळनेर आगारात वेळेवर पास उपलब्ध होत नसल्याने शालेय विद्यार्थ्यांचे शैक्षणिक नुकसान होत आहे. संपूर्ण शहरात ग्रामीण भागातुन सुमारे वीस ते पंचवीस हजार विद्यार्थी, विद्यार्थिनी शिक्षणासाठी रोज ये जा करतात. यात पारोळा तालुक्यातुन देखील येणाऱ्या विद्यार्थ्यांसाठी पास सवलतीची व्यवस्था अमळनेर आगारातच असल्याने याठिकाणी पास काढण्यासाठी अक्षरशः झुंबड उडते.
दरम्यान अमळनेर बसस्थानकात अनियमित बसफेऱ्यांचा तसेच ग्रामीण भागातील विद्यार्थ्यांना पास साठी येणाऱ्या अडचणी संदर्भांत विद्यार्थ्यांनी थेट आमदार अनिल पाटील यांचे कार्यालय गाठले व एसटीपास साठी येणाऱ्या अडचणीचा पाढा वाचला. आमदार पाटील यांनी विद्यार्थ्यांची बाजू ऐकून घेत प्रत्यक्ष बसस्थानकात विद्यार्थी व डेपो मॅनेजर यांच्याशी चर्चा करून पाससाठी एक खिडकी वाढविण्याची मागणी केली.
सध्या शाळा, कॉलेज नियमित सुरू झाल्या आहेत, अमळनेर डेपो तर्फे पास वितरित करण्यासाठी एकच खिडकी सुरू आहे. त्यामुळे शैक्षणिक सवलत पास मिळवण्यासाठी ४ ते ५ दिवस शाळा, कॉलेज बुडवून रांगेत उभे राहून सुद्धा पास मिळत नाही. यामुळे विद्यार्थ्यांचे शैक्षणिक नुकसान तर होतेच, पण पास नसल्यामुळे पूर्ण भाडे खर्च करून आर्थिक भुदंड विद्यार्थ्यांना सोसावा लागतो.
आमदार पाटील यांनी केलेल्या मागणीस तात्काळ प्रतिसाद देऊन विभाग नियंत्रक श्री. जगनोर यांनी तात्काळ पास वितरित करण्यासाठी दुसरी खिडकी उघडून दिली जाईल असे आश्वासन दिले. यावेळी कामगार नेते एल. टी. पाटील, राष्ट्रवादी शहर कार्याध्यक्ष प्रा.सुरेश पाटील उपस्थित होते.
