जळगाव, दि. ०४ – येथील सुभाष चौक मित्र मंडळ आणि स्वामी समर्थ केंद्राच्या संयुक्त विद्यमाने सामूहिक अथर्वशीर्ष पठणाचे आयोजन रविवार करण्यात आले. यावेळी हजारो भाविकांच्या उपस्थितीमध्ये आवर्तन म्हणण्यात आली. संपूर्ण चौक परिसर मंत्रमुग्ध आणि भक्तिमय झाला होता.
भवानी माता मंदिराचे पंडित महेशकुमार त्रिपाठी आणि त्यांच्या सहकाऱ्यांच्या मार्गदर्शनाखाली सामूहिक अथर्वशीर्ष पठण तसेच धार्मिक विधी पार पडला. यावेळी शहरातील सुमारे ५ हजार नागरिकांनी उपस्थिती देत अथर्वशीर्ष पठण सामूहिकरीत्या केले.
महाआरती झाल्यानंतर भाविकांना मोदकांचा महाप्रसाद देण्यात आला. यावेळी २१ भाविकांना लकी ड्रॉ द्वारे चांदीचा शिक्का आयोजकांच्या वतीने देण्यात आला. प्रसंगी प्रमुख पाहुणे म्हणून स्वामी समर्थ केंद्राचे विजय निकम, सुभाष चौक मित्र मंडळ अध्यक्ष श्रीकांत खटोड, उपाध्यक्ष मनीष अग्रवाल, कार्याध्यक्ष अलोक अग्रवाल उपस्थित होते. हर्षल चव्हाण, महेश गोला, मयूर कासार, बापू कापडणे, हरीश चव्हाण, संजय पांडे, बबलू गहलोत यांच्यासह कार्यकर्त्यांनी परिश्रम घेतले.
