जळगाव, दि.२८ – संजय गांधी निराधार योजनेचा लाभ मिळवून देण्यासाठी दोन हजार रुपयांची लाच स्वीकारताना जळगाव तहसील कार्यालयातील शिपाई मगन गोबा भोई यास बुधवारी जळगाव एसीबीच्या पथकाने रंगेहाथ अटक केली. दरम्यान या कारवाईने महसूल प्रशासनातील लाचखोरांच्या गोटात खळबळ उडाली.
सविस्तर वृत्त असे की, जळगावातील ३५ वर्षीय तक्रारदार या घटस्फोटीत आहे. त्यांच्या आई विधवा असल्याने त्यांनी संजय गांधी योजनेचा लाभ मिळण्यासाठी जळगावातील रेल्वे स्थानकाजवळील नगरपालिका क्षेत्र कार्यालयात संजय गांधी निराधार अनुदान योजनेखाली अर्थसहाय्य मिळण्यासाठी अर्ज केला होता. त्यास बराच कालावधी झाल्याने तक्रारदाराने कार्यालय गाठून भोई यांच्याशी संपर्क साधला असता त्यांनी तक्रारदारासह त्यांच्या आईच्या नावे अनुदान मंजुर करून आणून देतो असे सांगितले.
दरम्यान आईचे अनुदान मंजूर करण्यासाठी तीन हजार तर तक्रारदाराच्या अनुदानासाठी दोन हजार मिळून एकूण पाच हजार रूपयांची लाच मागितली मात्र दोन्ही प्रकरणात तडजोड होवून चार हजार देण्याचे ठरले व प्रथम तक्रादाराच्या आईचे अनुदान मंजुर करून आणून देण्यासाठी दोन हजार रुपये मागितले. तक्रारदाराने याबाबत एसीबीकडे तक्रार केल्यानंतर लाच लुचपत विभागाच्या वतीने पडताळणी करून संबंधित शिपाई मगन गोबा भोई याच्यावर कारवाई करण्यात आली.
जळगाव एसीबीचे पोलिस उपअधीक्षक शशीकांत पाटील, निरीक्षक संजोग बच्छाव, निरीक्षक एन.एन. जाधव, एएसआय दिनेशसिंग पाटील, एएसआय सुरेश पाटील, हवालदार अशोक अहिरे, सुनील पाटील, रवींद्र घुगे, शैला धनगर, मनोज जोशी, जनार्धन चौधरी, सुनील शिरसाठ, बाळू मराठे, प्रवीण पाटील, महेश सोमवंशी, नासीर देशमुख, ईश्वर धनगर, प्रदीप पोळ, राकेश दुसाने, सचिन चाटे, प्रणेश ठाकुर, अमोल सूर्यवंशी आदींच्या पथकाने सापळा रचून यशस्वी कारवाई केली.
