नाशिक, दि.०७ – येथील गिरणा गौरव प्रतिष्ठानतर्फे दिला जाणारा ‘गिरणा गौरव’ पुरस्कार अत्यंत थाटात जलपुरुष राजेंद्रसिंग यांच्या हस्ते ज्येष्ठ रंगकर्मी शंभु पाटील यांना प्रदान करण्यात आला. कवी कालिदास नाट्यगृहात हा सोहळा पार पडला. यावेळी अध्यक्षस्थानी रामदास फुटाणे, जलपुरूश राजेंद्रसिंग, पालकमंत्री छगन भुजबळ, गिरणा प्रतिष्ठानचे अध्यक्ष सुरेश पवार यांच्यासह मान्यवर उपस्थित होते. त्याच बरोबर पालकमंत्री छगन भुजबळ, राजन गवस, गुरू ठाकूर, नीलिमा मिश्रा या मान्यवरना देखील ‘गिरणा गौरव’ पुरस्कार प्रदान करण्यात आला.
नाट्यक्षेत्रातील योगदानाबद्दल हा पुरस्कार शंभु पाटील यांना प्रदान करण्यात आला असून गिरणा गौरव पुरस्कार विविध क्षेत्रातील मान्यवरांना दिला जातो. या वर्षांपासून तो नाट्यक्षेत्रातील रंगकर्मीना द्यायची सुरवात शंभु पाटील यांच्या पासून करण्यात आली. गिरणा काठावर कुवारखेडा गावच्या रंगकर्मीला मिळालेल्या या “गिरणा पुरस्कारा”च मोल मला अधिक आहे. ज्या नदीच्या पाण्यावर माझं भरण पोषण झालं, त्या नदीच्या नावाचा पुरस्कार मला मिळाला याचं श्रेय परिवर्तन जळगाव परिवाराला आहे. परिवर्तनने केलेले सृजनशील उपक्रम या मुळेच माझा सन्मान झाला अशी प्रतिक्रिया शंभु पाटील यांनी यावेळी व्यक्त केली.
या प्रसंगी कवी राजू देसले, कवी प्रकाश होळकर, विविध क्षेत्रातील मान्यवर उपस्थित होते. हा पुरस्कार डॉ. भालचंद्र नेमाडे, सिंधुताई सपकाळ, भवरलालभाऊ जैन, डॉ. मोहन आगाशे, ऍड. उज्वल निकम, रतनलाल सी. बाफना, लेखक रंगनाथ पठारे आदि मान्यवरांना या पूर्वी हा पुरस्कार देण्यात आला आहे.
