जळगाव, प्रतिनिधी :
वीजचोरीचा गुन्हा दाखल न करण्यासाठी १५ हजार रुपयांची लाच स्वीकारताना महावितरणच्या सहायक अभियंत्यासह दोन वरिष्ठ तंत्रज्ञांना लाचलुचपत प्रतिबंधक विभागाने शनिवारी रंगेहाथ पकडले. जळगावातील पांडे चौक परिसरात ही कारवाई करण्यात आली. विशाल वसंत नेमाडे (वय ३७), भरत कडू तायडे (वय ४५) आणि रवींद्र छन्नू पाटील (वय ४१, सर्व रा. जळगाव) अशी ताब्यात घेतलेल्या संशयितांची नावे आहेत.
एका ४० वर्षीय तक्रारदाराच्या घरी या तिघांनी नवीन वीजमीटर आणि उपकरणांची पाहणी केली होती. त्यानंतर तक्रारदाराला पांडे चौकात बोलावून वीजभार अधिक असल्याचे तसेच सर्व्हिस वायर बायपास करून वीजचोरी होत असल्याचे सांगितले. या प्रकरणात कारवाई न करण्यासाठी त्यांनी ४० हजार रुपयांची मागणी केल्याचे तक्रारीत नमूद आहे.
याबाबत तक्रारदाराने लाचलुचपत प्रतिबंधक विभागाकडे तक्रार केली. विभागाने केलेल्या पडताळणीनंतर तडजोडीअंती १५ हजार रुपये देण्याचे ठरले. त्यानुसार शनिवारी पांडे चौक परिसरात सापळा रचण्यात आला. भरत तायडे याने लाचेची रक्कम विशाल नेमाडे यांच्याकडे देण्यास सांगितले. नेमाडे यांनी १५ हजार रुपये स्वीकारताच एसीबीच्या पथकाने तिघांना ताब्यात घेतले.
याप्रकरणी एमआयडीसी पोलीस ठाण्यात गुन्हा दाखल करण्याची प्रक्रिया सुरू होती. पोलीस उपअधीक्षक योगेश ठाकूर, पोलीस निरीक्षक रेश्मा अवतारे, हवालदार बाळू मराठे, कर्मचारी राकेश दुसाने आणि मनोज पाटील यांच्या पथकाने ही कारवाई केली.
