जळगाव, दि. 26 – युवा सेना व ‘महापौर सेवा कक्ष’ यांच्या संयुक्त विद्यमाने प्रजासत्ताक दिनानिमित्त जळगावात बुधवारी शहरातील पंडित नेहरू चौक, जुन्या जळगावमधील रथ चौक, मेहरुणमधील विठ्ठल मंदिर चौक या ठिकाणी जळगाव शहराच्या प्रथम नागरिक तथा महापौर व जळगाव जिल्हा मध्यवर्ती सहकारी बँकेच्या संचालिका जयश्री सुनिल महाजन आणि महानगरपालिकेतील विरोधी पक्षनेते सुनील महाजन यांच्या हस्ते भारतमातेच्या प्रतिमेचे पूजन व माल्यार्पण करून अभिवादन करण्यात आले.
तसेच काव्यरत्नावली चौकात युवा सेनेचे विस्तारक किशोर भोसले व शिवसेनेचे नगरसेवक नितीन बरडे, तर ख्वाजामियाँ चौकात शिवसेनेचे माजी महानगरप्रमुख गजानन मालपुरे व युवा सेना जिल्हाप्रमुख शिवराज पाटील यांच्या हस्ते भारतमातेच्या प्रतिमेचे पूजन, माल्यार्पण होऊन अभिवादन करण्यात आले. यावेळी परिसरातील नागरिक मोठ्या संख्येने उपस्थित होते. दरम्यान ‘भारतमाता की जय’चा जल्लोष करण्यात आल्याने परिसरात चैतन्य आणि उत्साहाचे वातावरण निर्माण झाले होते.
शहरातील नेहरू चौक, रथ चौक, मेहरुणमधील विठ्ठल मंदिर चौक, काव्यरत्नावली चौक, ख्वाजामियाँ चौक आदी ठिकाणी भारत माता पुजन करण्यात आले. यावेळी युवासेनेचे पदाधिकारी उपस्थित होते.
