भुसावळ | प्रतिनिधी भुसावळ एमआयडीसी परिसरातील NRJ Pharmachem Pvt. Ltd. कंपनीला मध्यरात्रीच्या सुमारास भीषण आग लागल्याने परिसरात एकच खळबळ उडाली. प्लॉट क्रमांक D-69 येथे लागलेल्या या आगीची माहिती मिळताच अग्निशमन दलाने तातडीने घटनास्थळी धाव घेतली. आगीची तीव्रता लक्षात घेता जळगावसह भुसावळ, वरणगाव, दीपनगर आणि वरणगाव फॅक्टरी येथील अग्निशमन बंबांना पाचारण करण्यात आले. सर्व पथकांच्या अथक प्रयत्नांनंतर अखेर आगीवर नियंत्रण मिळवण्यात यश आले.
पोलीस कंट्रोल रूमवरून रात्री १२ वाजून ५४ मिनिटांनी आग लागल्याची माहिती मिळाली. त्यानंतर अग्निशमन दलाचे पथक तातडीने NRJ Pharmachem कंपनीकडे रवाना झाले. पथक घटनास्थळी पोहोचले तेव्हा कंपनी परिसरात आग मोठ्या प्रमाणात भडकलेली होती. आगीच्या धुराचे आणि ज्वाळांचे स्वरूप पाहता परिस्थिती गंभीर असल्याचे लक्षात आले.
दरम्यान, घटनास्थळी दोन गायी मृतावस्थेत आढळून आल्या. आगीचा वाढता धोका लक्षात घेऊन अतिरिक्त बंबांना तातडीने पाचारण करण्यात आले. त्यानंतर जळगाव अग्निशमन दल, भुसावळ नगरपरिषद, वरणगाव नगरपरिषद, दीपनगर औष्णिक विद्युत केंद्र तसेच वरणगाव फॅक्टरीच्या अग्निशमन बंबांनी संयुक्तपणे आग विझविण्याचे काम सुरू केले.
आगीचा प्रचंड भडका आणि धुराचे लोट यामुळे बचावकार्य आव्हानात्मक बनले होते. मात्र अग्निशमन दलाच्या जवानांनी परिस्थितीची पर्वा न करता शर्थीचे प्रयत्न सुरू ठेवले. अनेक बंबांच्या सहाय्याने पाण्याचा मारा करत आगीचा फैलाव रोखण्यात आला. अखेर अथक प्रयत्नांनंतर आगीवर नियंत्रण मिळविण्यात यश आले.
या अग्निशमन कार्यवाहीत वा.चा. प्रदीप धनगर यांच्यासह फायरमन सौरभ चिकटे, विठ्ठल पाटील, अहत्तेशाम शेख, सुमित सावळे आणि यश मनोरे यांनी सहभाग घेतला.
आगीचे नेमके कारण अद्याप स्पष्ट झालेले नसून संबंधित यंत्रणांकडून तपासणी करण्यात येत आहे. कंपनीचे नेमके किती नुकसान झाले, याचा तपशीलही तपासणीनंतर स्पष्ट होणार आहे.
