बोदवड | प्रतिनिधी : बोदवड शहरातील रेणुका माता मंदिर परिसरात घरफोडी करून अज्ञात चोरट्याने सोन्याचे दागिने आणि रोकड असा तब्बल २ लाख ६२ हजार ५०० रुपयांचा ऐवज लंपास केल्याची घटना समोर आली आहे. याप्रकरणी बोदवड पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी हुसेन अजगरअली बोहरी (वय ४०, व्यवसाय-व्यापार, रा. रेणुका माता मंदिराजवळ, बोदवड) यांच्या घराला अज्ञात चोरट्याने लक्ष्य केले. चोरट्याने घराच्या दरवाजाचे कडी-कोयंडा आणि कुलूप तोडून घरात अनधिकृत प्रवेश केला.
चोरट्याने घरातील सोन्याचे विविध दागिने तसेच रोकड लंपास केली. चोरी गेलेल्या ऐवजात १ लाख ४३ हजार रुपयांचे ५५ ग्रॅम वजनाचे सोन्याचे कंठहार, ३२ हजार ५०० रुपयांची १२.५ ग्रॅम सोन्याची साखळी, २६ हजार रुपयांच्या प्रत्येकी १० ग्रॅम वजनाच्या दोन सोन्याच्या अंगठ्या, तसेच १५ हजार रुपये किमतीच्या चांदीच्या चार वाट्या आणि २० हजार रुपयांची रोकड यांचा समावेश आहे.
फिर्यादीच्या म्हणण्यानुसार, २१ ऑगस्ट रोजी सायंकाळी ६ वाजेपासून २२ ऑगस्ट रोजी दुपारी ४.३० वाजेपर्यंतच्या कालावधीत ही घरफोडी झाल्याचा संशय आहे. घरात चोरी झाल्याचे लक्षात आल्यानंतर पोलिसांना माहिती देण्यात आली.
फिर्यादीच्या तक्रारीवरून बोदवड पोलीस ठाण्यात गुन्हा रजिस्टर क्रमांक १७८/२०२६ अन्वये भारतीय न्याय संहितेच्या कलम ३०५(अ), ३३१(३), ३३१(४) नुसार गुन्हा दाखल करण्यात आला आहे.
घटनेचा पुढील तपास पोलीस उपनिरीक्षक शुभम जाधव करीत आहेत. प्रभारी अधिकारी पोलीस निरीक्षक आशिष लव्हंगळे यांच्या मार्गदर्शनाखाली चोरट्याचा शोध घेण्यासाठी तपास सुरू आहे.
