रशियन कंपनीत गुंतवणुकीचे आमिष दाखवून जळगावातील वकिलाची साडेसात लाखांची फसवणूक; पुण्याच्या दोघांवर गुन्हा
जळगाव प्रतिनिधी रशियन कंपनीचे समभाग (शेअर्स) भारतात विक्रीस आल्याचा बनाव रचून, युरो-डॉलर ट्रेडिंग व बिटकॉईनच्या माध्यमातून दरमहा ३६० टक्क्यांपर्यंत परतावा देण्याचे आमिष दाखवत जळगावातील एका वकिलाची ७ लाख ६० हजार रुपयांची फसवणूक करण्यात आल्याचा प्रकार उघडकीस आला आहे. याप्रकरणी पुण्यातील विनोद निमानाथ सोनार (रा. कात्रज, पुणे) व आनंद परदेशी या दोघांविरोधात जळगाव सायबर पोलीस ठाण्यात गुन्हा दाखल करण्यात आला आहे.
विसांजी नगरातील ५७ वर्षीय वकील विजय बाबुलाल दाणेज यांनी दिलेल्या फिर्यादीनुसार, ही फसवणूक ६ जून २०१६ ते २८ मार्च २०२० दरम्यान झाली. संशयितांनी कथित जागतिक करारनामे, संचालकांची ओळखपत्रे व वृत्तपत्रांच्या बातम्या दाखवून दाणेज यांचा विश्वास संपादन केला. त्यानंतर बिटकॉईन खरेदी व गुंतवणुकीच्या नावाखाली ७ लाख १० हजार रुपये उकळले. सुरुवातीला ३७२ डॉलर कमिशन दिल्यानंतर खात्यावर आभासी नफा दिसत असला तरी रक्कम काढता येत नसल्याचे स्पष्ट झाले. पैसे परत मागितल्यावर ‘एन्काऊंटर’ करण्याची धमकी देण्यात आल्याचा गंभीर आरोपही तक्रारीत केला आहे. या प्रकरणाचा पुढील तपास पोलीस निरीक्षक प्रदीप ठाकूर करत आहेत.
