खिर्डी बुद्रुक येथे बंद घर फोडून दीड लाखाचा मुद्देमाल लांबवला; निंभोरा पोलिसांत गुन्हा दाखल
रावेर: रावेर तालुक्यातील खिर्डी बुद्रुक येथे बंद घराचे कुलूप तोडून अज्ञात चोरट्यांनी सोन्या-चांदीच्या दागिन्यांसह १ लाख २७ हजारांची रोकड, असा एकूण १ लाख ५० हजार ४०० रुपयांचा मुद्देमाल चोरून नेल्याची घटना घडली आहे. याप्रकरणी निंभोरा पोलीस ठाण्यात भारतीय न्याय संहितेच्या कलम ३०५(अ) आणि ३३१(३) नुसार अज्ञात चोराविरुद्ध घरफोडी व चोरीचा गुन्हा नोंदवण्यात आला आहे.
पोलिसांनी दिलेल्या माहितीनुसार, खिर्डी बुद्रुक येथील शेतकरी प्रदीप अशोक महाजन (३२) हे १८ ऑगस्ट रोजी सकाळी ८ वाजेच्या सुमारास घर बंद करून बाहेर गेले होते. दुपारी १.३० वाजेच्या सुमारास अज्ञात चोरट्याने बंद घराच्या मुख्य दरवाजाचे कुलूप तोडून आत प्रवेश केला. चोरट्याने कपाटातील ३ ग्रॅम वजनाच्या सोन्याच्या बाळ्या, २० ग्रॅमचे चांदीचे कडे व चैन आणि १ लाख २७ हजार रुपयांची रोकड लंपास केली. या प्रकरणी पोलीस उपनिरीक्षक ममता तडवी यांच्या मार्गदर्शनाखाली पुढील तपास सुरू आहे.
