जळगाव, (प्रतिनिध) : महाराष्ट्र आरोग्य विज्ञान विद्यापीठाच्या २८ व्या वर्धापनदिनानिमित्त येथील डॉ. उल्हास पाटील वैद्यकीय महाविद्यालय व रुग्णालय परिसरात ध्वजारोहण सोहळा मोठ्या उत्साहात संपन्न झाला. या दिमाखदार सोहळ्याची सुरुवात महाविद्यालयाचे अधिष्ठाता डॉ. प्रशांत सोलंके यांच्या हस्ते ध्वजारोहणाने झाली. गोदावरी हेल्थ सिटी अंतर्गत कार्यरत असलेल्या विविध महाविद्यालयांचे अधिष्ठाता, प्राध्यापक, अधिकारी तसेच कर्मचारी या प्रसंगी मोठ्या संख्येने उपस्थित होते.
ध्वजारोहणानंतर उपस्थितांनी महाराष्ट्र आरोग्य विज्ञान विद्यापीठाचे अधिकृत गीत सादर केले. यानंतर विद्यापीठाच्या स्थापनेपासून ते आजपर्यंतच्या २८ वर्षांच्या उल्लेखनीय आणि यशस्वी वाटचालीचा आढावा घेण्यात आला. कार्यक्रमाचे सूत्रसंचालन डॉ. उल्हास पाटील वैद्यकीय महाविद्यालय व रुग्णालयाचे रजिस्ट्रार प्रमोद भीरूड यांनी केले.
यावेळी उपस्थित मान्यवरांनी आपल्या मनोगतातून विद्यापीठाने वैद्यकीय शिक्षण, संशोधन आणि आरोग्यसेवा क्षेत्रात दिलेल्या भरीव योगदानाचा गौरव करत, विद्यापीठाच्या सातत्यपूर्ण प्रगतीबद्दल समाधान व्यक्त केले. विद्यार्थ्यांच्या सर्वांगीण विकासासाठी तसेच गुणवत्तापूर्ण आरोग्यसेवा व आधुनिक संशोधनाला चालना देण्यासाठी विद्यापीठ नेहमीच कटिबद्ध असल्याचे यावेळी अधोरेखित करण्यात आले. महाराष्ट्र आरोग्य विज्ञान विद्यापीठाच्या उज्ज्वल भविष्यासाठी शुभेच्छा देऊन या दिमाखदार सोहळ्याचा समारोप झाला. या वर्धापनदिनानिमित्त संपूर्ण महाविद्यालय परिसरात आनंदाचे आणि उत्साहाचे वातावरण निर्माण झाले होते.
