चोपडा, (प्रतिनिधी) : शहरातील प्रताप हायस्कूल आणि तहसील कार्यालयाच्या पाठीमागील स्मशानभूमी रस्त्यालगत सुरू असलेल्या एका मोठ्या वेश्याव्यवसाय रॅकेटचा चोपडा शहर पोलिसांच्या पथकाने पर्दाफाश केला आहे. या धडक कारवाईत पोलिसांनी ६ पीडित महिलांची सुटका केली असून दोन महिला आरोपींना ताब्यात घेतले आहे.
याप्रकरणी एकूण ११ जणांवर गुन्हा दाखल करण्यात आला असून, उर्वरित ९ जण फरार झाले आहेत. पोलिसांच्या या धाडसी कारवाईमुळे शहरात आणि परिसरात प्रचंड खळबळ उडाली आहे.
पोलिसांना मिळालेल्या खात्रीशीर गोपनीय माहितीच्या आधारे, २९ मे रोजी सायंकाळच्या सुमारास प्रताप हायस्कूल आणि तहसील कार्यालयाच्या मागील परिसरातील स्मशानभूमी रस्त्यालगत पोलिसांनी अचानक छापा टाकला. या ठिकाणी संशयित महिलांना पैशांचे आमिष दाखवून आणि स्वतःच्या आर्थिक फायद्यासाठी त्यांना आश्रय देऊन, त्यांच्याकडून सक्तीने वेश्याव्यवसाय करून घेतला जात असल्याचे पोलीस तपासात उघड झाले आहे.
या कारवाई दरम्यान पोलिसांनी ज्या ६ महिलांची सुटका केली, त्या प्रामुख्याने राजस्थान आणि नेपाळ येथील रहिवासी असल्याचे प्राथमिक तपासात समोर आले आहे. या पीडित महिलांना सध्या कायदेशीर संरक्षण देण्यात आले असून, त्यांना आवश्यक ती मदत पुरवण्याची प्रक्रिया सुरू आहे.
सदर कामगिरी पोलीस अधीक्षक श्रीकांत धिवरे यांच्या मार्गदर्शनाखाली पोलीस निरीक्षक पवन देसले व त्यांच्या पथकाने केली. दरम्यान, चोपडा शहर पोलिसांनी नागरिकांना आवाहन केले आहे की, परिसरात मानवी तस्करी, वेश्याव्यवसाय अथवा महिलांच्या शोषणासंदर्भात कोणतीही संशयास्पद माहिती आढळल्यास तात्काळ पोलिसांशी संपर्क साधावा. अशा समाजघातक गुन्ह्यांविरुद्ध पोलिसांची कठोर कारवाई यापुढेही सुरूच राहील, असा इशारा प्रशासनाने दिला आहे.
