जळगाव, (प्रतिनिधी) : अवैध सावकारी प्रकरणी अनुकूल अहवाल पाठवण्यासाठी आणि पुढील सुनावणीची तारीख देण्यासाठी तब्बल ५ लाख रुपयांची लाच मागून, तडजोडीअंती पहिला हप्ता म्हणून १ लाख ५० हजार रुपयांची लाच स्वीकारताना जळगाव येथील उपनिबंधक (सहकार खाते, वर्ग-१) जगदीश बाबूराव बारी आणि त्यांच्या सांगण्यावरून लाच स्वीकारणारा खाजगी इसम देविदास धनसिंग पाटील यांना लाचलुचपत प्रतिबंधक विभागाने (ACB) रंगेहात पकडले. या धडक कारवाईमुळे जळगावच्या सहकार क्षेत्रात आणि शासकीय वर्तुळात खळबळ उडाली आहे.
तक्रारदार यांच्यावर अवैध सावकारीच्या अनुषंगाने उपनिबंधक कार्यालयात सुनावणी सुरू होती. तक्रारदार व त्यांच्या पत्नीविरुद्ध गुन्हा दाखल होऊ नये आणि चौकशी अहवाल अनुकूल पाठवावा, यासाठी उपनिबंधक जगदीश बाबूराव बारी (वय ५६, रा. भुसावळ) यांनी सुरुवातीला ५ लाख रुपयांची लाच मागितली होती. तक्रारदार यांची लाच देण्याची इच्छा नसल्याने त्यांनी १८ मे २०२६ रोजी जळगाव एसीबीकडे तक्रार नोंदवली.
एसीबीने १८ मे रोजी केलेल्या पडताळणीत उपनिबंधक बारी यांनी ५ लाखांवरून तडजोडीअंती ३ लाख रुपये देण्याचे ठरवले. तसेच “मागच्या वेळी वकील लावून आमचे नुकसान केले, म्हणून नकारात्मक अहवाल दिला होता. पण आता अनुकूल अहवाल देतो,” असे सांगत लाचेचा पहिला हप्ता १ लाख ५० हजार रुपये आरोपी देविदास धनसिंग पाटील (वय ४४, मानद कार्यकारी अधिकारी, जळगाव जिल्हा बँक असोसिएशन) यांच्याकडे देण्यास सांगितले.
त्यानुसार, आज २० मे २०२६ रोजी एसीबीच्या पथकाने बी.जे. मार्केटमधील जळगाव जिल्हा अर्बन को-ऑपरेटिव्ह बँक्स असोसिएशनच्या कार्यालयात सापळा रचला. तक्रारदार यांच्याकडून दीड लाखांची रोकड स्वीकारताना खाजगी इसम देविदास पाटील याला रंगेहात अटक करण्यात आली. या प्रकरणी जिल्हापेठ पोलीस ठाण्यात भ्रष्टाचार प्रतिबंधक कायद्यान्वये गुन्हा नोंदवण्याची प्रक्रिया सुरू आहे.
ही कारवाई एसीबी नाशिक परिक्षेत्राचे पोलीस अधीक्षक भारत तांगडे, अप्पर पोलीस अधीक्षक माधव रेड्डी, सुनील दोरगे यांच्या मार्गदर्शनाखाली, जळगावचे पोलीस उप अधीक्षक योगेश ठाकूर यांच्या पर्यवेक्षणात पोलीस निरीक्षक रेश्मा अवतारे, अंमलदार हेमंत नागरे, बाळू मराठे, संगीता पवार, मनोज पाटील आणि सचिन चाटे यांच्या पथकाने केली. पुढील तपास पोलीस निरीक्षक स्मिता नवघरे करत आहेत.
