जळगाव, (प्रतिनिधी) : जिल्ह्यातील फैजपूर आणि वरणगाव पोलीस ठाण्याच्या हद्दीत गॅस एजन्सीचे गोडाऊन फोडून गॅस सिलेंडरची चोरी करणाऱ्या सराईत गुन्हेगारांच्या टोळीला स्थानिक गुन्हे शाखेने जेरबंद केले आहे. या कारवाईत पोलिसांनी तीन आरोपींना अटक केली असून त्यांच्याकडून ४ लाख २७ हजार ५०० रुपये किमतीचा मुद्देमाल हस्तगत केला आहे.
मिळालेल्या माहितीनुसार, एप्रिल महिन्यात फैजपूर येथील श्रीधर गॅस एजन्सी आणि वरणगाव येथील भारत गॅस एजन्सीच्या गोडाऊनमधून अज्ञात चोरट्यांनी मोठ्या प्रमाणात गॅस सिलेंडर लंपास केले होते. या गुन्ह्यांचे गांभीर्य लक्षात घेता पोलीस अधीक्षक श्रीकांत धिवरे यांनी स्थानिक गुन्हे शाखेला तपासाचे आदेश दिले होते.
एलसीबीचे वरिष्ठ पोलीस निरीक्षक राहुल गायकवाड यांच्या मार्गदर्शनाखाली पथकाने तांत्रिक माहिती आणि गोपनीय बातमीदारांच्या आधारे तपास चक्र फिरवले. या तपासाअंती शेख बिलाल शेख नबी (वय ३२, रा. कासोदा), वसीम खान शाबीर खान (वय ३१, रा. तांबापुरा) आणि चेतन सुरेश काळे (वय ३८, रा. नशिराबाद) या तिघांना ताब्यात घेण्यात आले. सखोल चौकशीत त्यांनी दोन्ही ठिकाणच्या चोरीची कबुली दिली आहे.
हस्तगत केलेला मुद्देमाल:
भरलेले ६२ सिलेंडर (किंमत १,५५,०००/-) तसेच ९५ रिकामे सिलेंडर (किंमत १,४२,५००/-) आणि एक मोपेड गाडी (किंमत १,३०,०००/-) असा एकूण ४,२७,५०० रुपयांचा मुद्देमाल हस्तगत केला आहे.
आरोपींना पुढील तपासासाठी फैजपूर पोलिसांच्या ताब्यात देण्यात आले असून, पोलीस उपनिरीक्षक मैनुद्दीन सैय्यद व विनोद गाभणे या प्रकरणाचा अधिक तपास करत आहेत. ही कामगिरी पोलीस अधीक्षक श्रीकांत धिवरे, अपर पोलीस अधीक्षक संदीप गावीत यांच्या मार्गदर्शनाखाली एलसीबीच्या पथकाने यशस्वीरित्या पार पाडली.
