जळगाव, (प्रतिनिधी) : बनावट कॉल सेंटर प्रकरणी गेल्या काही काळापासून कारागृहात असलेले जळगावचे माजी महापौर ललित कोल्हे यांना आज सर्वोच्च न्यायालयाने (सुप्रीम कोर्ट) जामीन मंजूर केला आहे. प्रदीर्घ कायदेशीर लढाईनंतर कोल्हे यांना हा मोठा दिलासा मिळाला असून, यामुळे त्यांच्या सुटकेचा मार्ग आता मोकळा झाला आहे.
ममुराबाद रोडवरील ‘एल. के. फार्म’ या ठिकाणी पोलिसांनी काही महिन्यांपूर्वी धाड टाकली होती. या फार्म हाऊसवर बनावट कॉल सेंटर चालवून त्याद्वारे विदेशी नागरिकांची आर्थिक फसवणूक केली जात असल्याचा ठपका पोलिसांनी ठेवला होता. या जागेचे मालक म्हणून ललित कोल्हे यांच्यासह इतर संशयितांना पोलिसांनी अटक केली होती.
या अटकेनंतर ललित कोल्हे यांनी जामिनासाठी जळगाव जिल्हा आणि सत्र न्यायालयात धाव घेतली होती, मात्र त्यांचा अर्ज फेटाळण्यात आला. त्यानंतर उच्च न्यायालयानेही (हायकोर्ट) त्यांना दिलासा देण्यास नकार दिला होता. अखेर कोल्हे यांनी सर्वोच्च न्यायालयात जामिनासाठी दाद मागितली. दोन्ही बाजूंचा युक्तिवाद पूर्ण झाल्यानंतर, आज सर्वोच्च न्यायालयाने त्यांना जामीन मंजूर केला.
विशेष म्हणजे, मध्यंतरी झालेल्या जळगाव महानगरपालिकेच्या निवडणुकीत ललित कोल्हे यांनी कारागृहात असतानाच निवडणूक लढवली होती. त्यात त्यांनी विजयही संपादन केला होता. तेव्हापासून त्यांच्या जामिनाकडे संपूर्ण जळगाव जिल्ह्याचे लक्ष लागून होते.
