जळगाव, (प्रतिनिधी) : शहरातील शिरसोली रस्त्यावरील गुलाबराव देवकर कॉलेज ऑफ फार्मसीचा द्वितीय वर्षाचा विद्यार्थी श्याम प्रभाकर पाटील (वय १९) याने नैराश्यातून गळफास घेऊन आपली जीवनयात्रा संपवली. ही धक्कादायक घटना रविवारी संध्याकाळी नेहरू नगर येथील त्याच्या राहत्या खोलीत घडली. प्राचार्यांनी सर्वांसमोर केलेल्या मारहाणीमुळे अपमानित वाटल्याने श्यामने हे टोकाचे पाऊल उचलल्याचे त्याच्या खिशात सापडलेल्या ‘सुसाईड नोट’ वरून समोर आले आहे. याप्रकरणी पोलिसांनी प्राचार्य योगेश पवार यांच्यावर गुन्हा दाखल केला आहे.
मूळचा बोदवड (ता. मुक्ताईनगर) येथील रहिवासी असलेला श्याम जळगावमध्ये राहून शिक्षण घेत होता. रविवारी दि. १५ फेब्रुवारी रोजी संध्याकाळी ६ वाजेच्या सुमारास, रूमवर कोणीही नसताना त्याने गळफास घेतला. त्याचा रूममेट सुट्टीमुळे गावी गेलेला होता. बराच वेळ संपर्क न झाल्याने ही घटना उघडकीस आली.
सुसाईड नोटमधील हृदयद्रावक वास्तव..
श्यामच्या खिशात सापडलेल्या चिठ्ठीने सर्वांच्या डोळ्यांत पाणी आणले. त्यात त्याने नमूद केले की:
मित्रांच्या भांडणात मध्यस्थी करण्यासाठी गेलेल्या श्यामलाच प्राचार्यांनी पीव्हीसी पाईपने सर्व शिक्षक आणि विद्यार्थ्यांसमोर बेदम मारहाण केली.
”गुरु मारतात हे माहित आहे, पण इतकं नाही मारत,” असे त्याने चिठ्ठीत वेदनेने लिहिले आहे.
यापूर्वीही त्याला काही मुलांनी मारहाण केली होती, मात्र त्यावेळी प्राचार्यांनी दाद न देता उलट श्यामलाच शिवीगाळ केली होती.
”माझी स्टोरी इन्स्टावर टाक जो,” अशी शेवटची विनंती त्याने आपल्या मित्राला (रामू) केली आहे.
पालकांचा आक्रमक पवित्रा..
जोपर्यंत दोषी प्राचार्यांवर गुन्हा दाखल होत नाही आणि त्यांना अटक होत नाही, तोवर मृतदेह ताब्यात घेणार नाही असा पवित्रा श्यामच्या पालकांनी घेतला होता. अखेर रामानंद नगर पोलीस ठाण्यात गुन्हा दाखल झाल्यानंतर सोमवारी मृतदेह नातेवाईकांनी ताब्यात घेतला.
या घटनेमुळे शैक्षणिक क्षेत्रात मोठी खळबळ उडाली असून, विद्यार्थ्यांच्या मानसिक आरोग्याचा आणि शिक्षकांच्या वर्तणुकीचा प्रश्न पुन्हा ऐरणीवर आला आहे. पोलीस सध्या या प्रकरणाचा अधिक तपास करत असून सीसीटीव्ही फुटेज आणि इतर विद्यार्थ्यांचे जबाब नोंदवण्याचे काम सुरू आहे.
