जळगाव, (प्रतिनिधी) : खान्देशातील नवउद्योजक, तरुण आणि महिलांच्या स्वप्नांना जागतिक क्षितिज मिळवून देण्यासाठी स्थापन करण्यात आलेल्या ‘खान्देश इन्क्युबेशन टेक्नॉलॉजी अँड आंत्रप्रेनरशिप फोरम’ (KITE) या पहिल्या कम्युनिटी स्टार्टअप इन्क्यूबेशन सेंटरचा शुभारंभ २८ डिसेंबर २०२४ रोजी उत्साहात पार पडला. के. सी. ई. इंजिनिअरिंग कॉलेजमध्ये आयोजित या सोहळ्याने खान्देशातील औद्योगिक क्षेत्रासाठी एक नवे दालन खुले केले आहे.
कार्यक्रमाचे प्रमुख अतिथी म्हणून ‘सॅटर्डे क्लब ग्लोबल ट्रस्ट’चे (मुंबई) चेअरमन अशोक दुगाडे उपस्थित होते. आपल्या मार्गदर्शनात त्यांनी मराठी तरुणांना नोकरीच्या मानसिकतेतून बाहेर पडण्याचे आवाहन केले. “व्यावसायिकांनी केवळ जळगाव किंवा धुळ्यापुरते मर्यादित न राहता, राज्य आणि देशाबाहेर आपले पाय रोवावेत,” असा मोलाचा सल्ला त्यांनी यावेळी दिला.
अध्यक्षीय भाषणात कवयित्री बहिणाबाई चौधरी उत्तर महाराष्ट्र विद्यापीठाचे माजी प्र-कुलगुरू डॉ. पी. पी. माहुलीकर यांनी ग्रामीण व आदिवासी भागातील उद्योजकतेवर प्रकाश टाकला. नवीन उद्योग हे केवळ नफा मिळवणारे नसून ते शाश्वत, पर्यावरणपूरक आणि समाजोपयोगी असावेत, असे त्यांनी आवर्जून नमूद केले.
’काईट’चा उद्देश आणि व्याप्ती..
प्रास्ताविक करताना सागर पाटील यांनी स्पष्ट केले की, ‘काईट’ हे केवळ स्टार्टअप्ससाठीच नाही, तर सूक्ष्म, लघु व मध्यम उद्योजकांना (MSME) तांत्रिक आणि व्यावसायिक साहाय्य करण्यासाठी कटीबद्ध आहे. डॉ. शांताराम बडगुजर यांनी ‘काईट’ हा समाजासाठी आणि समाजाने चालवलेला एक अनोखा उपक्रम असल्याचे सांगितले.
यावेळी संस्थेच्या अधिकृत वेबसाईटचे उद्घाटन डॉ. भूषण चौधरी, डॉ. विकास गीते, डॉ. युवराज परदेशी आणि अजिंक्य तोतला यांच्या हस्ते करण्यात आले. तसेच तंत्रज्ञानविषयक स्टार्टअप्सना चालना देण्यासाठी ‘इलेक्ट्रो सॉफ्ट’ आणि ‘काईट’ यांच्यात सामंजस्य करार करण्यात आला. यावेळी निलेश वाघ व राजेश ठाकरे उपस्थित होते. ‘काईट’च्या ध्येयधोरणांची धुरा डॉ. शांताराम बडगुजर, डॉ. युवराज परदेशी, सागर पाटील व ऋतगंधा देशमुख सांभाळत आहेत.
कार्यक्रमाचे सूत्रसंचालन धनंजय धनगर यांनी केले, तर डॉ. युवराज परदेशी यांनी आभार मानले. या सोहळ्याच्या यशस्वीतेसाठी के.सी.ई. अभियांत्रिकी महाविद्यालय, आयएमआर कॉलेज, अपेक्स स्टार्टअप ग्रुप आणि सॅटर्डे क्लबच्या सदस्यांनी विशेष परिश्रम घेतले.
