जळगाव, (प्रतिनिधी) : शहरात भाड्याच्या घरात सुरू असलेल्या कुंटणखान्यावर उपविभागीय पोलीस अधिकारी आणि शनिपेठ पोलिसांनी संयुक्त कारवाई करत छापा टाकला. योगेश्वर नगर परिसरात सोमवारी झालेल्या या कारवाईत देहविक्री करणाऱ्या दोन महिलांची सुटका करण्यात आली असून, कुंटणखाना चालविणाऱ्या मुख्य संशयिताला पोलिसांनी ताब्यात घेतले आहे.
योगेश्वर नगर भागातील एका भाड्याच्या घरात अनैतिक व्यवसाय सुरू असल्याची गुप्त माहिती उपविभागीय पोलीस अधिकारी नितीन गणापुरे यांना मिळाली होती. माहितीची खातरजमा करण्यासाठी पोलिसांनी सोमवारी एक ‘डमी’ ग्राहक (पंटर) तयार केला. या पंटरने कुंटणखाना चालविणाऱ्याशी संपर्क साधला असता १५०० रुपयांत सौदा निश्चित झाला. पंटर घराच्या आत गेल्यानंतर त्याने पूर्वनियोजित संकेतानुसार पोलीस पथकाला मोबाईलवर ‘मिस कॉल’ देऊन इशारा केला.
इशारा मिळताच दबा धरून बसलेल्या पोलीस पथकाने घराला चारही बाजूंनी घेराव घालून छापा टाकला. यावेळी पोलिसांनी कुंटणखाना चालविणाऱ्या मालकाला ताब्यात घेत दोन पीडित महिलांची सुटका केली. भरवस्तीत अशा प्रकारे अवैध व्यवसाय सुरू असल्याने परिसरातील नागरिक गेल्या अनेक दिवसांपासून त्रस्त होते. या कारवाईमुळे परिसरातील नागरिकांनी समाधान व्यक्त केले.
ही धडक कारवाई उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस कर्मचारी रवींद्र मोतीराया, आवेश शेख, अमोल ठाकूर, प्रणय पवार आणि महिला पोलीस कर्मचारी स्मिता पाटील यांच्या पथकाने केली. याप्रकरणी शनिपेठ पोलीस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती.
