जळगाव, (प्रतिनिधी) : शहरातील रेल्वे स्टेशन परिसरात हॉटेलच्या खरेदी-विक्रीच्या जुन्या व्यवहारातून वाद होऊन एका व्यावसायिकाला बुधवारी (दि. २५ नोव्हेंबर) सायंकाळी जबर मारहाण करण्यात आल्याची गंभीर घटना उघडकीस आली आहे. या मारहाणीत जखमी झालेले व्यावसायिक खूबचंद साहित्य यांच्यावर सध्या रुग्णालयात उपचार सुरू आहेत.
पोलिसांनी दिलेल्या माहितीनुसार, जळगाव रेल्वे स्टेशन परिसरातील ‘हॉटेल के.पी. प्राईड’च्या खरेदी-विक्री व्यवहारातून हा संपूर्ण वाद निर्माण झाला होता, ज्याचे रूपांतर अखेरीस मारहाणीत झाले. बुधवारी सायंकाळी ६ वाजता खूबचंद साहित्य यांना लक्ष्य करून त्यांच्यावर जबर मारहाण करण्यात आली. या घटनेनंतर पोलिसांनी तातडीने सूत्रे हलवली.
जखमी व्यावसायिकाचा जबाब नोंदवून घेतल्यानंतर, गुरुवारी जळगाव शहर पोलीस स्टेशनमध्ये चार आरोपींविरुद्ध गुन्हा दाखल करण्यात आला आहे. या मारहाणीत देवेंद्र छोटू पवार आणि निखिल यांच्यासह आणखी दोन अज्ञात व्यक्तींचा समावेश असल्याची माहिती पोलिसांनी दिली आहे. पोलीस निरीक्षक यांच्या नेतृत्वाखालील पथक पुढील तपास करत असून आरोपींना लवकरच अटक करण्याचे प्रयत्न सुरू आहेत.
