एरंडोल, (प्रतिनिधी) : एरंडोल नगरपरिषद सार्वत्रिक निवडणूक २०२५ च्या पार्श्वभूमीवर शिवसेना-भाजपा महायुतीचे नगराध्यक्ष पदाचे अधिकृत उमेदवार डॉ. नरेंद्र धुडकु ठाकूर यांच्या प्रचारार्थ, तसेच प्रभाग क्रमांक ३ अ च्या उमेदवार छाया आनंद दाभाडे आणि ब च्या कमला गोपाळ पाटील यांच्या समर्थनार्थ, एरंडोल पारोळा विधानसभा मतदारसंघाचे आमदार अमोलदादा चिमणराव पाटील यांची भव्य प्रचार रॅली व कॉर्नर सभा बुधवारी प्रभाग क्र. ३ परिसरात मोठ्या उत्साहात पार पडली.
एरंडोल शहराच्या सर्वांगीण विकासासाठी एक उच्चशिक्षित, अनुभवी आणि चारित्रसंपन्न उमेदवार म्हणून डॉ. नरेंद्र ठाकूर यांच्याकडे आज एरंडोलकर आशेने पाहत आहेत. याच विश्वासाच्या बळावर, भाजप शिवसेना युतीचे लोकनियुक्त नगराध्यक्ष पदाचे उमेदवार डॉ. नरेंद्र ठाकूर यांचा विजय मोठ्या मताधिक्याने होईल, असा दृढ विश्वास आमदार अमोलदादा पाटील यांनी या प्रसंगी व्यक्त केला.
जनतेचा प्रचंड पाठिंबा लाभलेल्या या रॅलीत विकासाच्या निर्धाराने घोषणाबाजी करण्यात आली. एरंडोलकरांचा हा उत्स्फूर्त प्रतिसाद महायुतीच्या विजयाचा मार्ग निश्चितच मजबूत करणारा आहे. याप्रसंगी भाजपा-शिवसेना युतीचे प्रभाग क्र. ३ चे उमेदवार छाया दाभाडे, कमला गोपाळ पाटील यांच्यासह सुनीलभैय्या पाटील, शालिक गायकवाड, रवींद्र जाधव, जयश्री पाटील यांनीही आपले मनोगत व्यक्त केले.
या सभेला कुणाल महाजन, रुपेश महाजन, डॉ. नरेंद्र पाटील, सुभाष पाटील, आनंद दाभाडे, डॉ. गीतांजली ठाकूर यांच्यासह विश्वनाथ महाजन, बापू चोधरी, शांताराम महाजन, मांगीलाल ठाकरे यांच्यासह अनेक पदाधिकारी, कार्यकर्ते, शिवसैनिक, स्थानिक स्वराज्य संस्थांचे आजी-माजी पदाधिकारी, सदस्य व शहरवासीय मोठ्या संख्येने उपस्थित होते.
डॉ. नरेंद्र ठाकूर यांच्यासारख्या सुशिक्षित नेतृत्वामुळे एरंडोलच्या विकासाला नवी दिशा मिळेल, असा विश्वास मतदारांमध्ये दिसत आहे.
