जळगाव, (प्रतिनिधी) : कृषी क्षेत्राला पाणी बचतीतून समृद्धीकडे नेणाऱ्या जैन इरिगेशन सिस्टीम्स लि. कंपनीने पुन्हा एकदा निर्यातीत आपले जागतिक वर्चस्व सिद्ध केले आहे. कंपनीला प्लास्टिक एक्सपोर्ट प्रमोशन कौन्सिल (PLEXCONCIL) तर्फे २०२३-२४ आणि २०२४-२५ या दोन वर्षांसाठी विविध गटांमधून तब्बल आठ निर्यात उत्कृष्टता पुरस्कार प्रदान करण्यात आले.
मुंबई येथील हॉटेल द लीला येथे पार पडलेल्या या शानदार समारंभात केंद्रीय वाणिज्य मंत्री पीयूष गोयल यांच्या हस्ते जैन इरिगेशनचे उपाध्यक्ष अनिल जैन आणि त्यांच्या वरिष्ठ सहकाऱ्यांनी हे पुरस्कार स्वीकारले. जैन इरिगेशनने ठिबक सिंचन, पीव्हीसी फोमशीट, फिटिंग्ज आणि होसेस या विभागांतील उत्कृष्ट निर्यात कामगिरीसाठी हे पुरस्कार पटकावले असून, कंपनीने निर्यात पुरस्कारांमध्ये ‘हॅट्रीक’ केली आहे.
PLEXCONCIL च्या ७० व्या वर्धापन दिनानिमित्त आयोजित या सोहळ्यात मंत्री पीयूष गोयल यांनी प्लास्टिक क्षेत्राच्या शाश्वत विकासातून अर्थव्यवस्थेला बळ देण्याच्या भूमिकेचे कौतुक केले. १९९१ पासून जैन इरिगेशनला दरवर्षी या पुरस्काराने सन्मानित केले जात आहे.
▪️‘गुणवत्ता ही बाजारपेठेमध्ये विकत मिळत नसते तर ती प्रत्यक्ष जीवनात उतरावी लागते’ हे श्रद्धेय भवरलालजी जैन तथा मोठ्याभाऊंचे विचार प्रत्येक सहकाऱ्यांमध्ये संस्कारीत झाले आहे. यातून कृषी क्षेत्रामध्ये शाश्वतता आणण्यास प्रत्येक सहकारी प्रयत्न करत आहे. प्लास्टिककल्चरतून शेतीला कमीत कमी संसाधनातून उत्कृष्टतेकडे घेऊन आले आहे. जैन इरिगेशनच्या सहा दशकाच्या कार्याला अधोरेखित करुन १९९१ पासून ही पारितोषिके प्राप्त होत आहे. कंपनीच्या विविध विभागांमध्ये कार्य करणाऱ्या प्रत्येक सहकाऱ्यांचा व भूमिपुत्रांच्या कष्टांना समर्पित हा पुरस्कार असल्याचे मी मानतो.
– अशोक भवरलाल जैन, अध्यक्ष, जैन इरिगेशन सिस्टीम लि. जळगाव
