जळगाव, (प्रतिनिधी) : श्री संत ज्ञानेश्वर प्राथमिक व माध्यमिक विद्यालयांमध्ये भारतरत्न मौलाना अबुल कलाम आझाद यांची जयंती ‘राष्ट्रीय शिक्षण दिन’ म्हणून मोठ्या उत्साहात साजरी करण्यात आली. भारताचे पहिले शिक्षणमंत्री, अहिंसा समर्थक आणि थोर स्वातंत्र्यसेनानी असलेल्या मौलाना आझाद यांच्या शैक्षणिक कार्याची आठवण म्हणून हा दिन साजरा करण्यात आला.
जयंती निमित्त विद्यालयातील इयत्ता तिसरी व चौथीच्या विद्यार्थ्यांसाठी ‘रंगभरण स्पर्धा’ आयोजित करण्यात आली होती. स्पर्धेला सुरुवात करण्यापूर्वी मुख्याध्यापक मुकेश नाईक यांच्या हस्ते मौलाना अबुल कलाम आझाद यांच्या प्रतिमेला माल्यार्पण करण्यात आले.
पर्यवेक्षक शितल कोळी यांनी स्पर्धेचा निकाल घोषित केला. यात इयत्ता तिसरीची श्रुती पवन पाटील हिने प्रथम क्रमांक पटकावला, तर अक्षदा सचिन कोठे हिने द्वितीय क्रमांक मिळवला. यशस्वी विद्यार्थ्यांना शैक्षणिक वस्तू देऊन मुख्याध्यापकांच्या हस्ते सन्मानित करण्यात आले. कार्यक्रमाचे नियोजन स्वाती नाईक यांनी केले, तर रूपाली आव्हाड यांनी कार्यक्रमाचे सूत्रसंचालन केले.
