जळगाव, (प्रतिनिधी) : एमआयडीसी परिसरात घरफोडी करून १८५,००० रुपयांचे तांब्याचे तार चोरून नेणाऱ्या एका अट्टल चोरट्याला एमआयडीसी पोलिसांनी मोठ्या शिताफीने अटक केली आहे. गेल्या काही दिवसांपासून फरार असलेल्या या आरोपीकडून पोलिसांनी २७,००० रुपये किमतीचा मुद्देमाल जप्त केला आहे.
दि. १६ एप्रिल ते २७ एप्रिल २०२५ दरम्यान, जगवाणी नगर येथील एका दुकानाचे शटर वाकवून अज्ञात चोरट्यांनी १८५,००० रुपये किमतीचे तांब्याचे तार चोरून नेले होते. याप्रकरणी तक्रार दाखल झाल्यानंतर एमआयडीसी पोलीस ठाण्यात गुन्हा दाखल करण्यात आला होता. गुन्ह्याचा तपास करण्यासाठी पोलीस निरीक्षक बबन आव्हाड यांच्या मार्गदर्शनाखाली एक विशेष पथक तयार करण्यात आले होते. या पथकाने तपास करत यापूर्वी दोन आरोपींना अटक केली होती. मात्र, या टोळीतील मुख्य आरोपी, शिकवणसिंग बरियामसिंग उर्फ पटमलसिंग टाक, हा गुन्हा घडल्यापासून फरार होता.
४ ऑगस्ट रोजी, गुप्त बातमीदाराकडून मिळालेल्या माहितीनुसार, आरोपी वाघनगर परिसरात फिरत असल्याची माहिती मिळाली. या माहितीच्या आधारे पोलिसांनी तात्काळ कारवाई करत त्याला ताब्यात घेतले. पोलिसांनी दोन दिवसांची पोलीस कोठडी घेऊन त्याची कसून चौकशी केली. या चौकशीदरम्यान, त्याने चोरलेले २७,००० रुपये किमतीचे ५० किलो वजनाचे तांब्याचे तार पोलिसांना काढून दिले. पोलिसांनी हा मुद्देमाल जप्त केला असून पुढील तपास सुरू आहे.
ही यशस्वी कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, पोलीस उपअधीक्षक संदीप गावीत आणि पोलीस निरीक्षक बबन आव्हाड यांच्या मार्गदर्शनाखाली करण्यात आली. यामध्ये पोउपनि राहुल तायडे, सफौ विजयसिंग पाटील, पोहेकॉ गणेश शिरसाळे, पोना प्रदीप चौधरी आणि पोकॉ निलेश पाटील यांचा समावेश होता. पुढील तपास पोउपनि राहुल तायडे व पोकॉ निलेश पाटील करत आहेत.
