जळगाव, (प्रतिनिधी) : तालुक्यातील देवगाव येथे गिरणा धरणाजवळ शेतात काम करत असलेल्या ७३ वर्षीय महिलेवर बिबट्याने हल्ला केल्याची दुर्दैवी घटना घडली आहे. या हल्ल्यात इंदुबाई वसंत पाटील (वय ७३, रा. देवगाव) यांचा जागीच मृत्यू झाला. या घटनेमुळे संपूर्ण तालुक्यात भीतीचे वातावरण पसरले आहे.
सोमवार, ४ ऑगस्ट रोजी दुपारी सुमारे १२:३० वाजता इंदुबाई पाटील या त्यांच्या शेतात काम करत असताना बिबट्याने त्यांच्यावर हल्ला केला. बिबट्याने त्यांच्या डोक्यावर आणि चेहऱ्यावर गंभीर जखमा केल्याने त्यांचा जागीच मृत्यू झाला. त्यांच्यासोबत कोणीही नसल्याने मदतीसाठी कोणी धावून आले नाही.
नंतर शेतात काम करणाऱ्या बाळू पुना पाटील आणि रमेश पौलाद सोनवणे यांच्या लक्षात ही घटना येताच त्यांनी तातडीने पोलिसांना आणि वनविभागाला याची माहिती दिली. घटनास्थळी बिबट्याचे पायांचे ठसे आढळून आले आहेत. पोलिसांनी आणि वनविभागाच्या अधिकाऱ्यांनी घटनास्थळी धाव घेऊन पंचनामा केला. इंदुबाई पाटील यांना तातडीने जळगाव येथील शासकीय वैद्यकीय महाविद्यालय व रुग्णालयात दाखल करण्यात आले, मात्र डॉक्टरांनी त्यांना मृत घोषित केले.
या घटनेमुळे देवगावमधील ग्रामस्थांमध्ये संतापाचे वातावरण असून, वनविभागाने तात्काळ बिबट्याचा शोध घेऊन त्याला पकडण्याची मागणी होत आहे. जळगाव तालुका पोलीस ठाण्यात या घटनेची नोंद करण्यात आली असून, पुढील तपास सुरू आहे.
