जळगाव, (प्रतिनिधी) : जिल्हा परिषदेने आरोग्य सेवांमध्ये क्रांती घडवण्यासाठी आणि कर्मचाऱ्यांची उपस्थिती सुनिश्चित करण्यासाठी एक महत्त्वपूर्ण पाऊल उचलले आहे. मुख्य कार्यकारी अधिकारी (सीईओ) मिनल करनवाल यांच्या निर्देशानुसार, जिल्हा परिषदेच्या आरोग्य विभागातील सर्व कर्मचाऱ्यांसाठी आधार-आधारित बायोमेट्रिक हजेरी प्रणाली १०० टक्के कार्यान्वित करण्यात आली आहे. या निर्णयामुळे आरोग्य सेवा अधिक सुदृढ आणि पारदर्शक होण्यास मदत होणार आहे.
जिल्ह्यातील विविध प्राथमिक आरोग्य केंद्रांमध्ये कार्यरत आरोग्य कर्मचाऱ्यांनी नियमितपणे केंद्रांवर उपस्थित राहावे, यासाठी सीईओ करनवाल यांनी कठोर निर्देश दिले होते. या पार्श्वभूमीवर, कर्मचाऱ्यांचा आधार डेटा अद्ययावत करून फेस-रीडिंग (चेहरा ओळख) तंत्रज्ञानावर आधारित बायोमेट्रिक हजेरी प्रणालीची अंमलबजावणी यशस्वीरित्या पूर्ण करण्यात आली आहे.
ही प्रणाली केवळ आरोग्य विभागापुरती मर्यादित नसून, पहिल्या टप्प्यात जिल्हा परिषदेच्या मुख्यालयातील कार्यालयीन कर्मचाऱ्यांसाठीही बायोमेट्रिक हजेरी प्रणाली सुरू करण्यात आली आहे. प्रशासनाच्या माहितीनुसार, लवकरच ग्रामसेवक आणि प्राथमिक शिक्षक वर्गासाठीही आधार-आधारित बायोमेट्रिक प्रणाली लागू करण्यात येणार आहे.
या महत्त्वाकांक्षी उपक्रमाचा आढावा स्वतः सीईओ मिनल करनवाल प्रत्येक शुक्रवारी घेणार आहेत. यामुळे जिल्ह्यातील सरकारी सेवा अधिक कार्यक्षमतेने आणि पारदर्शक पद्धतीने नागरिकांपर्यंत पोहोचण्यास मदत होईल, अशी अपेक्षा व्यक्त केली जात आहे. प्रशासनाच्या या निर्णयामुळे कर्मचाऱ्यांमध्ये शिस्त वाढेल आणि आरोग्य सेवांची गुणवत्ता सुधारेल, अशी आशा आहे.
