जळगाव, (प्रतिनिधी) : जळगाव तालुक्यातील लमांजन येथे सोमवारी (दि. १४ जुलै) दुपारी २ वाजेच्या सुमारास एका तरुण नवविवाहितेने राहत्या घरी साडीने गळफास लावून आत्महत्या केल्याची हृदयद्रावक घटना उघडकीस आली आहे. अश्विनी गणेश पाटील (वय १९, रा. लमांजन) असे आत्महत्या केलेल्या नवविवाहितेचे नाव आहे. या घटनेने लमांजन गावात शोककळा पसरली असून, एमआयडीसी पोलीस ठाण्यात अकस्मात मृत्यूची नोंद करण्यात आली आहे.
अश्विनी पती गणेश पाटील आणि सासू यांच्यासोबत लमांजन येथे राहत होती. तिचे पती गणेश पाटील हे मेरिको कंपनीत कामगार आहेत, तर तिचे माहेर गावातच असून वडील सुधाकर पाटील शेती करतात. सोमवारी दुपारी २ वाजेच्या सुमारास अश्विनीची सासू शेतातील कामे आटोपून घरी परतल्या. त्यांनी दरवाजा उघडण्याचा प्रयत्न केला असता, अश्विनीने दरवाजा उघडला नाही. खिडकीतून डोकावून पाहिले असता, अश्विनीने साडीने गळफास घेतल्याचे धक्कादायक दृश्य त्यांना दिसले.
सासूने आवाज दिल्यानंतर शेजारील नागरिक धावत आले. ग्रामस्थांनी तातडीने अश्विनीला शासकीय वैद्यकीय महाविद्यालय व रुग्णालयात दाखल केले. मात्र, वैद्यकीय अधिकाऱ्यांनी तपासणीअंती तिला मृत घोषित केले. यावेळी कुटुंबीयांचा मन हेलावणारा आक्रोश केला. दरम्यान अश्विनीच्या आत्महत्येचे कारण अद्याप स्पष्ट झालेले नाही. एमआयडीसी पोलीस पुढील तपास करत आहेत.
