जळगाव, (प्रतिनिधी) : शहरातील बेंडाळे चौकात वाहतूक शाखेच्या दोन पोलीस कर्मचाऱ्यांवर लोखंडी कोयता आणि साखळीने हल्ला करण्याचा प्रयत्न झाल्याची धक्कादायक घटना शनिवारी, २१ जून रोजी सकाळी १०.३० वाजता घडली. या प्रकरणी शासकीय कामात अडथळा निर्माण केल्याप्रकरणी रात्री उशिरा शनीपेठ पोलीस ठाण्यात ५ जणांविरुद्ध गुन्हा दाखल करण्यात आला आहे.
शहर वाहतूक शाखेचे पोलीस कॉन्स्टेबल ज्ञानेश्वर कोळी आणि त्यांचे सहकारी राणी लक्ष्मीबाई पुतळ्याजवळ आपल्या कर्तव्यावर असताना ही घटना घडली. शनिवारी सकाळी वाहतूक नियमांची कारवाई सुरू असताना, अल्ताफ अहमद अब्दुल गफूर (वय ६४), मुजम्मिल अहमद अल्ताफ अहमद रंगरेज (वय ३०), जुबेर अहमद अल्ताफ अहमद रंगरेज (वय ३८, तिघे रा. बालाजी पेठ जळगाव), अरुण रामदास टिलोरे (वय ६७, रा. समता नगर) आणि आदिल बेग शरीफ बेग (वय २७, रा. रामनगर) या पाच आरोपींनी पोलिसांशी वाद घातला.
यावेळी आरोपींनी पोलिसांना शिवीगाळ केली. त्यानंतर एका आरोपीने आपल्या मोटरसायकलच्या डिक्कीतून (क्रमांक एमएच १९ बीएन ००७८) धारदार लोखंडी कोयता आणि लोखंडी साखळी काढून पोलीस कर्मचारी ज्ञानेश्वर कोळी आणि त्यांच्या सहकाऱ्यांवर धावून जात धक्काबुक्की केली. या प्रकारामुळे पोलिसांच्या शासकीय कामात अडथळा निर्माण झाला.
पोलीस कॉन्स्टेबल ज्ञानेश्वर कोळी यांनी या घटनेबाबत शनीपेठ पोलीस ठाण्यात फिर्याद दिली. त्यानुसार, वरील पाचही आरोपींविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक योगेश ढिकले करत आहेत.
