जळगाव, (प्रतिनिधी) : जळगाव शहरातील सम्राट कॉलनी परिसरातील हूडको समोर तलवारीने दहशत माजवून नागरिकांमध्ये भीतीचे वातावरण निर्माण करणाऱ्या एका तरुणाला एमआयडीसी पोलिसांनी ताब्यात घेतले आहे. धीरज दत्ता हिवराळे (वय २२, रा. सम्राट कॉलनी, जळगाव) असे अटक करण्यात आलेल्या तरुणाचे नाव असून, त्याच्यावर एमआयडीसी पोलीस ठाण्यात गुन्हा दाखल करण्यात आला आहे. विशेष म्हणजे, आरोपी धीरज हिवराळे याच्यावर यापूर्वीही दोन गंभीर स्वरूपाचे गुन्हे दाखल आहेत.
मिळालेल्या माहितीनुसार, वरिष्ठ पोलीस निरीक्षक संदीप पाटील यांना गोपनीय बातमी मिळाली की, सम्राट कॉलनी परिसरातील हूडको समोर एक इसम हातात तलवार घेऊन रस्त्यावर आरडाओरड करत दहशत माजवत आहे. या माहितीच्या आधारे तात्काळ कारवाई करत पोलिसांनी घटनास्थळी धाव घेतली. त्यावेळी धीरज दत्ता हिवराळे हातात तलवार घेऊन दहशत माजवत असल्याचे दिसून आले. पोलिसांनी त्याला ताब्यात घेतले असून, त्याच्याविरुद्ध गुन्हा दाखल करण्यात आला आहे.
