जळगाव, (प्रतिनिधी) : कामानिमित्त जळगाव शहरात येत असताना नशिराबाद गावाजवळ विरुद्ध दिशेने येणाऱ्या भरधाव डंपरने तरुणांच्या दुचाकीला जबर धडक दिली. या धडकेमध्ये दुचाकीवरील एक तरुण ठार झाला तर दोन जण गंभीर जखमी झाले आहेत. या प्रकरणी नशिराबाद पोलीस स्टेशनला गुन्हा दाखल करण्याचे काम सुरू होते. दरम्यान रुग्णालयामध्ये तरुणाच्या नातेवाईकांनी मन हेलावणारा आक्रोश केला.
तेजस सुनील बिऱ्हाडे (वय २१, रा. नशिराबाद ता.जळगाव) असे मयत तरुणाचे नाव आहे. तो आई, वडील, भाऊ, बहीण यांचेसह गावात राहत होता. तेजसचे वडील मजुरी काम करतात. तर त्याच्यासह त्याचे मित्र तुषार युवराज बिऱ्हाडे (वय १९), अजय अफलातून सपकाळे (वय २२ सर्व रा. नशिराबाद ता. जळगाव) हे खान्देश बँड पथक येथे कामाला आहेत. दरम्यान गुरुवार दि १५ मे रोजी जळगाव येथे बँड पथकाचे काम करण्यासाठी तेजस बिऱ्हाडे, तुषार बिऱ्हाडे आणि अजय सपकाळे हे दुचाकीने नशिराबाद येथून निघाले होते. काही अंतरावर आल्यावर राणे हॉटेल जवळ विरुद्ध दिशेने येणाऱ्या भरधाव डंपरने तरुणांच्या दुचाकीला जबर धडक दिली.
या अपघातामध्ये तेजस बिऱ्हाडे हा जागीच ठार झाला. तर तुषार व अजय या गंभीर जखमी तरुणांना शासकीय वैद्यकीय महाविद्यालय व रुग्णालयात उपचारासाठी दाखल करण्यात आले आहे. घटनेची माहिती मिळताच नशिराबाद येथील ग्रामस्थ आणि नातेवाईकांनी शासकीय रुग्णालयामध्ये धाव घेतली. या ठिकाणी तेजसचा मृतदेह पाहून कुटुंबीयांनी मन हेलावणारा आक्रोश केला. घटनेतील डंपर आणि त्यातील चालक हे नशिराबाद पोलीस स्टेशन येथे पोलिसांनी जमा केले आहे. तर नशिराबाद पोलीस स्टेशनला गुन्हा दाखल करण्याचे काम सुरू होते. या घटनेमुळे नशिराबाद गावावर शोककळा पसरली आहे.
