अमळनेर, (प्रतिनिधी) : दूध वाटप करून घरी परतत असलेल्या तरुणीच्या दुचाकीला अज्ञात वाहनाने धडक दिल्याने तिचा मृत्यू झाल्याची धक्कादायक घटना तालुक्यातील लोंढवे शिवारात घडली. घटना दि. १२ रोजी रात्री साडे आठ वाजता अमळनेर धुळे रस्त्यावर लोंढवे फाट्याच्या पुढे घडली. अमळनेर पोलीस स्टेशनला अज्ञात वाहन चालकाविरोधात गुन्हा दाखल करण्यात आला आहे.
भाग्यश्री दीपक पाटील (वय २२) असे मयत तरुणीचे नाव आहे. जानवे येथील भाग्यश्री दीपक पाटील ही तरुणी वडिलांच्या दुग्ध व्यवसायात हातभार लावण्यासाठी मोटरसायकलला दुधाचे कॅन बांधून एकटी जानव्याहून कधी धुळे तर कधी अमळनेर येत असे. धाडसी कन्या भाग्यश्रीमुळे तिचे वडील दीपक पाटील यांनी व्यवसायात वृद्धी केली होती. दीड महिन्यापूर्वीच मोटरसायकल घसरून तिच्या वडिलांचा अपघात झाला होता. डॉक्टरांनी त्यांना दुचाकी चालवायला बंदी घातली होती. त्यामुळे मुलगी भाग्यश्री हीच दूध ने आण करणे, वाटप करणे हे काम करत होती.
नेहमीप्रमाणे भाग्यश्री १२ रोजी रात्री साडे आठ वाजेच्या सुमारास मोटरसायकल क्रमांक (एम एच १९, ईबी ६०२७) हिच्यावर दुधाचे कॅन घेऊन अमळनेर येत असताना लोंढवे शिवारात अज्ञात वाहनाने कट मारल्याने मोटरसायकल रस्त्यावर आडव्या पडलेल्या झाडावर जाऊन आदळली. यात भाग्यश्री खाली पडून डोक्याला मार लागून गंभीर जखमी झाली. ग्रामस्थांनी भाग्यश्रीला दवाखान्यात दाखल केले. तेथे मात्र डॉक्टरांनी तिला तपासून मृत घोषित केले. नितीन पाटील यांच्या फिर्यादीवरुन अमळनेर पोलीस स्टेशनला अज्ञात वाहन चालकविरुद्ध मृत्यूस कारणीभूत ठरल्याप्रकरणी गुन्हा दाखल करण्यात आला आहे.
