जळगाव, (प्रतिनिधी) : विवाहितेने मुलीच्या झोक्याला गळफास लावून घेत आत्महत्या केल्याची धक्कादायक घटना शनिवारी दि.५ एप्रिल रोजी पहाटे मुक्ताईनगर शहरात श्री कॉलनी येथे उघडकीस आली आहे. याप्रकरणी मुक्ताईनगर पोलीस स्टेशनला अकस्मात मृत्यूची नोंद करण्यात आली आहे.
सोनाली गणेश पाटील (वय ३८ वर्षे, रा. पिंप्री नांदु ह.मु. श्री कॉलनी, मुक्ताईनगर) असे मयत विवाहितेचे नाव आहे. पती व २ मुलींसह त्या राहत होत्या. त्यांचे पती खाजगी वाहनावर चालक तर सोनाली ह्या साडी विक्री करून उदरनिर्वाह करीत होत्या. दरम्यान, शुक्रवारी दि. ४ एप्रिल रोजी घरातील सर्व सदस्य हे रात्री झोपी गेल्यावर शनिवारी दि. ५ एप्रिल रोजी पहाटे सोनाली पाटील यांनी किचनमधील झोक्याच्या दोरीला गळफास लावून आत्महत्या केली.
तिचे पती गणेश यांना जाग आली असता पहाटे ३ वाजता घटना उघड झाली. सोनाली यांना उपजिल्हा रुग्णालयात दाखल केले असता डॉक्टरांनी मयत घोषित केले. यावेळी परिवाराने मन हेलावणारा आक्रोश केला. घटनेप्रकरणी मुक्ताईनगर शहरात शोककळा पसरली असून पोलीस स्टेशनला अकस्मात मृत्यूची नोंद करण्यात आली आहे.
