जळगाव, (प्रतिनिधी) : तालुक्यातील एका गावात १५ वर्षीय अल्पवयीन मुलीवर अत्याचार केल्याने ती गर्भवती राहून तिने एका बाळाला जन्म दिला. या मुलीला शेतालगत असलेल्या नाल्याजवळ बोलवून तिच्यावर संशयित आरोपीने अत्याचार केला असून जळगाव तालुका पोलीस स्टेशनला गुन्हा दाखल करण्यात आला आहे.
ही घटना तालुक्यातील एका गावात घडली. या प्रकरणी अत्याचार करणारा गणेश अशोक बोरसे याला अटक करण्यात आले आहे. १५ वर्षीय अल्पवयीन मुलीला नात्यातीलच गणेश बोरसे याने गावठाण परिसरातील शेतालगतच्या नाल्याजवळ बोलविले होते. तेथे त्याने बळजबरीने तिच्यावर अत्याचार केला. त्यानंतर याविषयी कोणाला काहीही न सांगण्याची धमकीदेखील त्याने या मुलीला दिली.
तो वेळोवेळी मुलीला नाल्याजवळ बोलवून तिच्यावर अत्याचार करीत राहिला. त्यामुळे अल्पवयीन मुलगी गरोदर राहिली. शासकीय वैद्यकीय महाविद्यालय व रुग्णालयात तिची प्रसूती होऊन तिने एका बाळाला जन्म दिला. या प्रकरणी अल्पवयीन मुलीने तालुका पोलिस ठाण्यात फिर्याद दिली. त्यावरून गणेश बोरसे याच्याविरुद्ध बलात्कार, पोस्को कलमान्वये गुन्हा दाखल करण्यात येऊन अटक करण्यात आली आहे. या घटनेमुळे जळगाव तालुक्यात खळबळ उडाली आहे.
