जळगाव, (प्रतिनिधी) : मुक्ताईनगर तालुक्यात मलकापूरकडे जाणाऱ्या महामार्गावर शनिवार दि. ५ एप्रिल रोजी सकाळी ७ वाजेच्या सुमारास भरधाव पिकअप वाहन टायर फुटल्याने व चालकाकडून नियंत्रण सुटल्याने पलटी झाले. या घटनेत १ जण ठार झाला असून ६ जण जखमी झाले आहेत. या प्रकरणी मुक्ताईनगर पोलीस स्टेशनला चालकाविरुद्ध गुन्हा दाखल करण्यात आला आहे.
बनिया सबला बारेला (वय ४०, रा. अडनदी ता. सेंधवा जि. बडवानी, मध्य प्रदेश, हल्ली मु. चिंचोली शिवार ता. जि. जळगाव) असे मयत तरुणाचे नाव आहे. मयत बनिया बारेला याचा भाऊ रामसिंग सुभाष उर्फ सबला बारेला (वय ४४ वर्ष, रा. हरीविठ्ठल नगर, जळगाव) याने याबाबत फिर्याद दिली आहे. मध्य प्रदेशातून मुक्ताईनगरकडे येणारे पिकअप वाहन (एमपी १० झेडडी ४४४७) तुरीचे पोते घेऊन येत असताना वाहनाचे टायर फुटले व चालकाचे नियंत्रण सुटल्याने वाहन पलटी झाले.
या अपघातामध्ये बनिया बारेला याच्या डोक्याला गंभीर दुखापत झाल्यामुळे तो जागीच ठार झाला. तर गुड्ड्या वरजू बारेला (रा. ढवळ्यागिर ता. सेंधवा जि. बडवाणी), प्रेमसिंग दिलदार बारेला, दाविद बनिया बारेला (दोन्ही रा. अडनदी ता. सेंधवा जि. बडवानी), विकास ठाकूर रावत (रा. पीपलझोपा ता. भगवापुरा जि. खरगोन), महेश रामलाल बारेला (रा. भागपुर नशिराबाद ता. जळगाव) हे जखमी झाले आहे. चालक विनोद सहादरिया खरते (रा. शिरवेल महादेव ता. भगवानपुरा, जि. खरगोन, मध्यप्रदेश) याच्याविरोधात मुक्ताईनगर पोलीस स्टेशनला गुन्हा दाखल करण्यात आला आहे. तपास पोलीस निरीक्षक नागेश मोहिते यांच्या मार्गदर्शनाखाली हेडकॉन्स्टेबल महेश सुरवाडे करीत आहेत.
